Цар тахлын нөлөөгөөр эрчимтэй тэлсэн онлайн худалдааны зах зээл энэ онд өсөлтөө хадгалах төлөвтэй байна. Ялангуяа жижиглэн худалдааны борлуулалтын орлого нь 14.3 хувиар өсөж, таван их наяд ам.доллар давах тооцоог “EMarketer” зах зээлийн судалгааны байгууллага гаргажээ.

“Коронавирус”-ийн халдвар тархсан 2020 онд дэлхий даяар жижиглэн худалдааны зах зээл сайн үзүүлэлттэй байгаагүй ч онлайн худалдааны орлого энэ онд цар тахлын өмнөх төсөөллийг давах төлөвтэй байгааг шинэ тайландаа онцолжээ.

Олон улсын цахим худалдааны нийт борлуулалт 2018 онд найман хувиар өсөж, 25.6 их наяд ам.доллартой тэнцсэнийг НҮБ-ын Худалдаа, хөгжлийн байгууллага өнгөрсөн оны дөрөвдүгээр сард танилцуулсан юм. Энэ нь хамгийн сүүлд гаргасан албан тоон үзүүлэлт юм. Тухайн жилд 1.4 тэрбум хүн онлайнаар худалдаа хийсэн байна. Мөн хэрэглэгч төвтэй зах зээлд АНУ, БНХАУ, Их Британи тэргүүлжээ.

Цахим худалдааны “B2B”, “B2C” борлуулалт 2018 оны олон улсын дотоодын нийт бүтээгдэхүүний 30 хувьтай тэнцсэн байна. Цар тахлын нөлөөгөөр цахим шилжилтийн хурд нэмэгдэж байгаа нь энэ зах зээлд дэмжлэг болж байгааг НҮБ-ын Худалдаа, хөгжлийн байгууллагын Технологи, логистикийн албаны захирал онцолсон юм.

Дотоодод цахим худалдааны зах зээл тэлж байгааг энэ чиглэлд үйл ажиллагаа явуулж буй компаниуд онцолж байна. “Ялангуяа хөл хорионы үед онлайн худалдаанаас өөр сонголтгүй болсон нь хэрэглэгчдийг илүү "бэлтгэж" өгсөн” гэж “Shoppy.mn” онцолж байлаа. Тус компани платформ түрээсийн үйлчилгээ үзүүлж байна. Энэ чиглэлд “Shoppy.mn”-ийн харьяа “Cody” технологийн компанийн хөгжүүлсэн платформд суурилж 60 гаруй компани цахим худалдааны үйлчилгээ үзүүлж байгаа юм байна.

Оффлайн орчинд байсан борлуулалт нь онлайн горимд шилжсэнээр борлуулалт нь нэмэгдсэн талаар мэдээллээ. 2020 оны байдлаар “Shoppy.mn”-ийн бүртгэлтэй хэрэглэгчдийнх нь тоо 400 мянга хүрч, давхардсан тоогоор 1.9 сая хэрэглэгч платформд нь ханджээ.

Мөн энэ чиглэлд үйл ажиллагаа явуулж буй “Banana Mall”-ийн хувьд платформд нь брэнд, бүтээгдэхүүнээ байршуулах хүсэлтэй компанийн тоо хөл хорионы өмнөх үетэй харьцуулахад 4-5 дахин өссөн байна. Мөн 100 хувь оффлайн буюу дэлгүүрийн худалдан авалтад анхаардаг байсан бизнесүүд хөл хорионоос шалтгаалж онлайн худалдаанд шилжиж эхэлснийг онцлов.

Цар тахал тохиосон 2020 онд “Banana Mall”-ийн борлуулалт сард дунджаар 50 хувиар өсжээ. Одоогоор 250 мянга гаруй бүртгэлтэй хэрэглэгчтэй. Цар тахлын үеэр ариутгал, хамгаалал, гэр ахуйн цахилгаан бараа, гар утас болон дагалдах хэрэгслүүдийн борлуулалт хамгийн өндөр өсөлттэй байсныг тус компани мэдээлсэн юм.

Б.Ариунболд

Холбоо барих: ariunbold.b@bloombergtvmongolia.com

minjma.g@bloombergtvmongolia.com