Газрын ховор элементийн олборлолтоор БНХАУ-д тэргүүлдэг Өвөр Монголын “Baotou Steel Rare Earth” компани энэ оны нэгдүгээр улиралд 69.38 сая юанийн ашиг олсон байна. Гэвч энэ нь өнгөрсөн оны мөн үеэс 71.71 хувиар буурсан дүн болжээ. Мөн борлуулалтын орлого нь 1.09 тэрбум юань болж, 2013 оны мөн үеэс 52.76 хувиар буурсан талаар тус компанийн санхүүгийн тайланд дурджээ. Үүний шалтгааныг зах зээлийн уналтаас шалтгаалан борлуулалтын хэмжээ болон үнэ нь буурсантай холбон тайлбарлаж байна. Түүнчлэн БНХАУ газрын ховор элементийн нийлүүлэлтээ хязгаарлах бодлого баримталсан төдийгүй Дэлхийн худалдааны байгууллагаас тус улсын эсрэг авч хэрэгжүүлсэн арга хэмжээ нь “Baotou Steel Rare Earth”-ийн ашигт нөлөөлжээ. Хэрэв БНХАУ-ын экспортыг хязгаарласан зохицуулалтыг цуцалбал үнийн уналтаас үүдэж хүндхэн болоод байгаа энэ салбарын нөхцөл байдал ээдрээтэй болно гэж “Baotou Steel Rare Earth”-ийн удирдлагууд мэдэгдээд байгаа юм. Дашрамд дурдахад “Baotou Steel Rare Earth”-ийн толгой компани болох “Baotou Steel Union” жилд таван сая тонн ган боловсруулах хүчин чадалтай үйлдвэрийг Монгол Улсад байгуулахаар төлөвлөж байгаа ажээ. Үүнтэй холбогдуулж Сайншандын аж үйлдвэрийн цогцолборын бүтээн байгуулалтыг хэрэгжүүлэх ажлын хүрээнд Монголын талаас “Baotou Steel Union”-тай хэлэлцээр хийж эхэлсэн байна. 

Т.Элиса 

Холбоо барих: elisa.t@bloombergtvmongolia.com 

minjma.g@bloombergtvmongolia.com