Шанхай хотноо 1985 оноос хойш уламжлал болон жил бүр зохиогдож ирсэн "Auto Shanghai 2013" үзэсгэлэнд автомашин үйлдвэрлэгч "Toyota"," Audi", "General Motors" зэрэг томоохон компаниудаас гадна БНХАУ-ын үйлдвэрлэгчид оролцож байна. Энэхүү үзэсгэлэнд танилцуулж байгаа автомашины загваруудын ихэнх нь хүрээлэн буй орчинд ээлтэй, шатахуунд хэмнэлттэй байгаагаараа онцлог болж байна. АНУ-ын зах зээлд амжилттай борлуулагдаж байгаа Японы "Toyota" компани "Vios", "Yaris" загварын машинуудаа танилцуулж байгаа бол "Audi" компани тансаг зэрэглэлийн автомашины төрөлд "BMW"-г гүйцэх зорилгоор 141 мянган ам.долларын үнэтэй "RS6 Avant" загвараа танилцуулж байгаа аж. Харин "BMW"-ийн хувьд “X4 crossover” загвар үзэгчдийн таашаалд ихээр нийцэж байгаагаас гадна "Chrysler", "Acura", "Mercedes-Benz", "Volkswagen" компанийн шинэ загварууд ч олны сонирхлыг ихээр татаж байгаа гэнэ. Зохион байгуулагчид энэхүү үзэсгэлэнд нийт 1300 шинэ загварыг танилцуулахаас гадна 800 мянга гаруй хүн оролцоно гэж тооцоолсон байна.