“Гашуунсухайт”, “Шивээхүрэн” боомтоор гаргаж байгаа нүүрсний экспорт нэмэгдэж байгаа ч хэвийн түвшиндээ хүрээгүй хэвээр байна. Өнгөрсөн оны мөн үетэй харьцуулахад 2.6 дахин бага байгаа энэ үед ажиллах хүчний нөхцөл байдал ямархуу байгааг тоймлоё. IV сарын эцсийн байдлаар нүүрс олборлогч 34 уурхай байгаагаас 15 нь нүүрс экспортолсон талаар АМГТГ мэдээлснийг “Аsia Мining” сэтгүүл нийтэлжээ. Нүүрсний экспортын ихэнхийг буюу 80 орчим хувийг “Эрдэнэс тавантолгой” ХК, “Энержи ресурс” ХХК, “Тавантолгой” ХХК, “Монголын алт корпораци” ХХК, “Саусгоби сэндс” ХХК компаниуд бүрдүүлжээ. IV сарын эцсийн байдлаар нүүрсний экспортын 34 компанийн 10 хүрэхгүй нь олборлолтоо хэвийн үргэлжлүүлж, бусад нь олборлолт огт хийгээгүй байгаа талаар “Аsia mining” сэтгүүл мэдээлсэн. Нүүрсний экспорт тодорхой хэмжээгээр сэргэхгүй бол 70 гаруй мянган хүн орлогогүй болно гэж Монголын уул уурхайн үндэсний ассоциаци мэдэгдсэн. Тухайлбал, “Тавантолгой” ххк хөрс хуулалтаа зогсоосон. Компани үндсэн 200, туслан гүйцэтгэгч компаниудын 1500-аад ажилтантай. Үүнээс үндсэн ажилчид хэвийн ажиллаж байгаа бол туслан гүйцэтгэгчид сул зогссон гэж энэ сарын эхээр мэдээлсэн. “Монголын алт корпорац”-ийн үндсэн уулын ажлууд, хөрс хуулалт, өрөмдлөг, тэсэлгээний ажил зогссон. Нийт ажиллах хүчний тал нь хэвийн, үлдсэнийг нь ээлжээр ажиллуулж байгаа гэж мэдээлж байсан. Дотооддоо эрчим хүчний нүүрс нийлүүлдэг компаниудад хүндрэл байгаа боловч том эрсдэл багатай гэж Монголын эрчим хүч, геологи, уул уурхайн үйлдвэрчний эвлэлийн холбоо мэдээлсэн. Гэхдээ Хөвсгөл аймагт Могойн гол уурхайгаас эрчим хүчний нүүрс олборлодог “Могойн гол” ХК энэ жил үйл ажиллагаагаа өргөжүүлж, ажилчдынхаа тоог 40 хувиар нэмэхээр төлөвлөж байсан ч одоо эсрэгээрээ байгаа ажилчдаа цөөлөхөд хүрээд байгааг хэлсэн юм. Өнөөдрийн байдлаар нүүрс экспортлогч уурхайнуудын ажиллах хүчний тоо 8000 байгаа гэж “Аsia Мining” сэтгүүл мэдээлсэн. Үүний 20 гаруй хувь нь орон нутгийн иргэд гэсэн баримжаа тооцооллыг тус сэтгүүл гаргажээ.

Т.Элиса

Холбоо барих: elisa.t@bloombergtvmongolia.com

uyanga.m@bloombergtvmongolia.com