Зах зээлийн үнэлгээгээр дэлхийд тэргүүлэгчдийн нэг "Apple" компанийн борлуулалтын орлого 2018 оны санхүүгийн жилийн IV улиралд 20 хувиар өсөж, 62.9 тэрбум ам.долларт хүрсэн байна.

“Apple Music”, “App Store”-ийн орлого түүхэн дээд түвшиндээ хүрч өсжээ. Тайлант хугацаанд 46.9 сая ширхэг “iPhone” борлуулж, 37.2 тэрбум ам.долларын орлого олсон байна. Энэ нь шинэ “iPhone “танилцуулсан улирал гэдэг утгаараа шинжээчдийн таамагт хүрээгүй үзүүлэлт болжээ. Тус компани есдүгээр сард шинэ “iPhone”-уудаа танилцуулсан юм.

Түүнчлэн энэ долоо хоногийн эхээр “iPad”, “Mac”-ийн шинэчилсэн загваруудыг олонд танилцууллаа. Бүтээгдэхүүнүүдийнх нь борлуулалтын өсөлт буурч байгаагаас тус компани үнээ нэмэгдүүлэх стратеги баримталж байгааг шинжээчид онцолж байна.

Үүнээс гадна тус компани ирэх жилээс “iPhone”, “iPad”, “Mac” зэрэг гол бүтээгдэхүүнийнхээ борлуулалтын тоо ширхгийг мэдээлэхгүй байхаар шийдвэрлэжээ. Энэ нь борлуулалтын тааруу үзүүлэлтээ мэдээлэхээс зайлсхийсэн, нөгөө талаас компани үйлчилгээний бизнестээ илүү төвлөрөхийг зорьж байгаагийн илэрхийлэл гэж шинжээчид харж байгаа юм.

"Apple"-ийн үйлчилгээний бизнесийн орлого IV улиралд 17 хувиар өсөж, 9.9 тэрбум ам.долларт хүрсэн байна. Үүнд “iCloud”, “Apple Music,” “iTune Video” худалдан авалт, аппликэйшн таталтууд багтаж байгаа юм.

Үүнээс гадна дижитал сонин, видео контент нэвтрүүлэхээр төлөвлөөд байгаа “Apple”-ийн ирэх улирлын орлогын таамаг шинжээчдийн урьдчилсан тооцооллоос доогуур байсан байна. Үүнийг “Apple”-ийн Гүйцэтгэх захирал Тим Кук Энэтхэг, Бразил зэрэг хөгжиж буй орнуудад эрэлт буурсан, валютын ханшийн хөдөлгөөн борлуулалтад сөргөөр нөлөөлөхтэй холбон тайлбарлажээ.

Зах зээлийн үнэлгээ нь нэг их наяд ам.доллараар хэмжигдэх “Apple” тайлангаа танилцуулсны дараа хувьцааны ханш нь долоон хувиар буурсан байна. Ингэснээр үнэлгээ нь 75 тэрбум ам.доллараар буурчээ. “Apple”-ийн нийлүүлэгчдийн хувьцааны ханш мөн буурсан байна.

Н.Номин-Эрдэнэ

Холбоо барих: nominerdene.n@bloombergtvmongolia.com

minjma.g@bloombergtvmongolia.com