Хонгконгт эсэргүүцлийн жагсаал үргэлжилж байгаа энэ үед интернэт худалдааны “Alibaba” компани Хонгконгийн Хөрөнгийн биржид амжилттай IPO гаргалаа. Тус компанийн татан төвлөрүүлсэн хөрөнгө 11 тэрбум ам.доллар дөхсөн байна.

Нэгж хувьцаагаа 176 хонгконг доллар буюу үнийг тогтоохоос өмнөх өдрийн Нью-Йоркийн Хөрөнгийн биржийн хаалтын ханшаас гурав орчим хувиар хямд арилжлаа. “Alibaba” төлөвлөсөн ёсоор 11 тэрбум ам.доллар хөрөнгө оруулагчдаас татсанаар бэлэн мөнгөний нөөц нь 44 тэрбум ам.доллар дөхөөд байна. Энэ үзүүлэлтээрээ интернэтийн тэргүүлэх компаниудаас нэгдүгээрт бичигдэж байгаа юм.

Гол өрсөлдөгч “Amazon”-ийн бэлэн мөнгөний нөөц “Alibaba”-ийнхаас бараг хоёр дахин бага байна. “Alibaba”-ийн хувьцаа Хонгконгийн Хөрөнгийн биржид 9988 гэсэн кодтойгоор 11 дүгээр сарын 26-ны өдрөөс хоёрдогч зах зээлд арилжаалагдаж эхлэх юм байна.

Тус компани таван жилийн өмнө Нью-Йоркийн Хөрөнгийн биржид анхны IPO-оо гаргаж, 25 тэрбум ам.долларын хөрөнгө босгож байсан юм. Харин одоо ийнхүү Хонгконгт давхар бүртгэлтэй болж байна. Энэ нь БНХАУ-ын дотоодын хөрөнгө оруулагчдад хувьцаагаа хүргэх боломжийг ойртуулж байгаа гэж шинжээчид тайлбарлаж байгаа юм. Хонгконгийн IPO-ийн дүн олон улсын хэмжээнд 2019 оны хамгийн өндөр дүнтэй IPO-ийн нэгд тооцогдож байна.

БНХАУ-ын эдийн засгийн өсөлт саарч байгаа ч “Alibaba”-ийн бизнес улам тэлж байгааг шинжээчид онцолж байна. Тус компанийн III улирлын орлого 40 хувиар өсжээ. Хэрэглэгчийнх нь тоо тогтмол өсөж байгаа бөгөөд 2023 он гэхэд жилийн идэвхтэй хэрэглэгчийн тоог нэг тэрбум хүргэх зорилтыг “Alibaba”-ийн шинэ Гүйцэтгэх захирал Даниэл Зэнг дэвшүүлээд байгаа аж. Мөн энэ жилийн “Singles’ Day”-ээр “Alibaba”-ийн платформоор хийсэн борлуулалт 38 тэрбум ам.доллар давж, шинэ дээд амжилт тогтоосон юм.

М.Золбоо| @Manlaizolboo

Холбоо барих: zolboo.m@bloombergtvmongolia.com

minjma.g@bloombergtvmongolia.com