Ураны нөөцөөрөө дэлхийд тэргүүлэгч, Монгол Улсад үйл ажиллагаа эрхэлдэг "Арева" компани ураны шинэ нөөц илрүүлсэн гэдгээ мэдэгдсэн байна. Монгол Улсын хэмжээнд 14.1 мянган км.кв 27 талбайд ураны хайгуул явуулдаг Францын төрийн өмчит "Арева" компани 54 мянга гаруй тонн ураны таамаг нөөцтэй ордыг "Зөөвч-Овоо" төслөөс олж илрүүлсэн байна. Одоогоор энэхүү ордын нөөцийг Эрдэс баялгийн зөвлөлөөр оруулж батлуулаад байгаа бөгөөд Ашигт малтмалын газрын даргын гарын үсгээр баталгаажуулах ажил үлдсэн байна. Нөөц илэрсэнтэй холбогдуулж "Арева-Монгол" компаниас "Дорноговь аймгийн Улаанбадрах сумын нутагт байрлах Зөөвч-Овоо ордын нөөц батлагдсанаар Монгол Улс ураны нөөцийн хэмжээгээрээ дэлхийд тэргүүлэх 10 улсын тоонд багтах боломжтой болох юм. Үүнээс гадна 0.01 хувийн ураны агуулгатай энэ орд нь сүүлийн 20 жилд нээгдэж байгаа дэлхийн томоохон ордын нэг юм" гэсэн мэдэгдэл хийсэн байна. Дашрамд дурдахад, Зөөвч-Овоогийн ураны ордын багтаамж нь Казахстаны томоохон ордуудтай хэмжээний хувьд ойролцоо гэдгийг эх сурвалж онцлоод байгаа ажээ.