Монгол Улсын Засгийн газраас зах зээл дэх нүүрсний үнийг тогтворжуулах зорилгоор хэрэгжүүлж буй “Нүүрс” хөтөлбөр өнөөдрөөс хэрэгжиж эхэллээ. Хоёр дахь жилдээ хэрэгжүүлж байгаа уг хөтөлбөрийн хүрээнд энэ жил 10 вагон нүүрсийг 55 цэгээр борлуулж эхлэхээр болжээ. Өвлийн ид ачааллын үед нүүрс борлуулах цэгийн тоог нэмэгдүүлж 130 орчимд хүргэх юм байна. Нүүрс борлуулах цэгээр дамжин иргэдэд очих 40 кг-аар савласан нэг шуудай нүүрсийг энэ жил 3200 төгрөгөөр борлуулахаар тогтоогоод байгаа бөгөөд нэг тонн нүүрс 80 мянга орчим төгрөгийн үнэтэй байх аж. Энэ жил Багануурын уурхай, Төмөр зам, Эрчим хүчний яам, цэргийн албан хаагчид, жолооч болон борлуулагч нарын оролцоотойгоор нүүрсийг иргэдэд түгээх ажлыг хийхээр болжээ. Түүнчлэн энэ өвлөөс 40 кг-аар савласан шуудай нүүрсийг иргэдэд гэрийнх нь хаягаар хүргэж өгч байхаар төлөвлөсөн байна. Монгол Улсын Ерөнхий сайд Н.Алтанхуяг “Нүүрс” хөтөлбөрийн хүрээнд ачиж, буулгах ангийн ажилтай өнөөдөр танилцахдаа “Төрөөс мөнгө төгрөгийн дэмжлэг үзүүлээгүй, зөв зохион байгуулалтын дүнд иргэдэд хямд нүүрс хоёр дахь жилдээ хүрч байгааг” онцоллоо. Өнгөрсөн жил 95 мянган тонн нүүрсийг иргэдэд хүргэсэн бол энэ өвөл 200 мянга гаруй тонн нүүрс түгээх юм байна. Одоогийн байдлаар Багануурын уурхай 700 гаруй тонн нүүрс нөөцлөөд байгаагаа мэдээлжээ.

Холбоо барих: minjma.g@bloombergtvmongolia.com