Энэ он гарсаар Монгол Улсын хэмжээнд 12 орчим мянган хос гэрлэлтээ батлуулсан болохыг Улсын Бүртгэлийн Ерөнхий газраас мэдээллээ. Өнгөрсөн сард л гэхэд 364 хос гэрлэлтээ бүртгүүлсэн нь сүүлийн таван сарын хамгийн өндөр үзүүлэлт болжээ. Ер нь хуримын улирал гэж хэлж болох 8, 9 дүгээр сард гэрлэлтээ бүртгүүлсэн хосуудын тоо өмнөх саруудаас 20 орчим хувиар их байдаг аж. Харин энэ он гарсаар Гэрлэх ёслолын ордонд 700 гаруй хос ёсолсон болохыг Хуримын ордноос мэдээллээ. Хуримын ордонд монгол ёс заншлын дагуу гэрлэлтээ батлуулахад 750-800 мянган төгрөгийн үнэтэй байдаг байна. Харин Намрын дунд сарын шинийн 17 буюу хамгийн их ачаалалтай өдөр 1.2 сая төгрөгөөр үйлчлэхээр үнэ тогтоожээ. Хуримын ордонд ёслох зардал хуримын бусад үйлчилгээтэй харьцуулахад харьцангуй хямд байгаа аж. Өнөөдрийн байдлаар Монгол Улсад 10 орчим компани хуримын бүхий л үйл ажиллагааг 100 хувь зохион байгуулж байна. Хуримын үйл ажиллагаа зохион байгуулдаг компаниудын хөлс хамгийн багадаа 15 сая төгрөгөөс эхэлдэг байна. Гэхдээ хуримын даашинз, гоёл чимэглэл хосуудын бөгж гээд хуримын зардал хосуудын сонголтоос шалтгаалан үнэ нь өөр өөр байгаа ажээ. Хуримын чимэглэл дунджаар 600-800 мянган төгрөгийн ханштай байдаг бөгөөд "Хайрын гоёл" компани сард дунджаар 10 орчим хуримын чимэглэл хийдэг болохоо мэдээллээ. Хамгийн тансаг хуримын чимэглэлийн багц гэхэд л 5-6 сая төгрөгийн үнэтэй байх аж. Түүчнлэн хуримын даашинз дунджаар нэг сая төгрөгийн үнэтэй байгаа бол хуримын болон сүйн бөгжний ханш 5-6 сая төгрөгийн ханштай байна.

Э.Нарантунгалаг

Холбоо барих: narantungalag.e@bloombergtvmongolia.com

minjma.g@bloombergtvmongolia.com