Дэлхийн ихэнх улс оронд 5G сүлжээ нэвтрээгүй байгаа ч Засгийн газрууд, компаниуд аль хэдийн 6G технологийг хөгжүүлэхээр хамтран ажиллаж байна.

БНХАУ өнгөрсөн оны 11 дүгээр сард 6G сүлжээний туршилт хийхээр хиймэл дагуул хөөргөөд байгаа юм. Харин АНУ-ын Засгийн газар Умард Америкт 6G технологийг түрүүлж хэрэглээнд нэвтрүүлэх зорилгоор “Next G Alliance” нэртэй холбоо байгуулсан байна.

Европын Холбооны 6G утасгүй сүлжээний төслийг “Nokia” компани ахалж, “Ericsson AB”, “Telefonica” зэрэг компани нэгджээ. Хэдий тийм боловч одоогийн хурдаараа ойрын 15 жилд 6G сүлжээний технологи гарах магадлал бага байгааг “Frost & Sullivan” компани онцолж байна. 6G сүлжээ нь 5G сүлжээний дээд хурднаас хамгийн багадаа 100 дахин хурдан, 10 дахин бага хоцрогдолтой ч одоогоор 6G сүлжээний ачааллыг дааж чадах чип гараагүй байгаа юм.

Монгол Улсын хувьд 5G сүлжээний технологийг 2023 он гэхэд нэвтрүүлэх талаарх бодлогын баримт бичгийг Харилцаа холбоо, мэдээллийн технологийн газар батлаад байна. Энэ хүрээнд долоодугаар сард 5G технологийг туршихаар төлөвлөжээ.

“Юнител”, “Мобиком” зэрэг үүрэн холбооны оператор компаниуд 5G сүлжээг нэвтрүүлэх бэлтгэл ажлаа эхлүүлээд байна. Түүнчлэн Улсын Их Хурал цахим аюулгүй байдалтай холбоотой гурван хуулийн төслийг хэлэлцэхээр хүлээгдэж байна. Хувийн мэдээлэл хамгаалах тухай, нийтийн мэдээллийн тухай төслийг УИХ-д өргөн мэдүүлэхээр болсон юм.

Харин Кибер аюулгүй байдлын тухай хуулийн төслийг гуравдугаар сарын 23-нд олон нийтээр хэлэлцүүллээ. Энэхүү хуулийн төсөлд мэдээллийн аюулгүй байдлын аудит хийх харилцааг хуульчилж өгсөн нь шинэлэг зохицуулалт болж байгаа юм.

Ж.Зоригт | @TeraReader

Холбоо барих: zorigt.j@bloombergtvmongolia.com

minjma.g@bloombergtvmongolia.com