Хөгжлийн банкны эх үүсвэрээс жижиг, дунд үйлдвэрт олгох зээлийн хүүг 9 хувиар тооцохоор болсон байна. Үйлдвэржилтийг дэмжих зорилтуудын хүрээнд экспортыг нэмэгдүүлэх, импортыг орлох бүтээгдэхүүн үйлдвэрлэл, борлуулалтыг дэмжих, ажлын байр бий болгох зорилгоор 200 тэрбум төгрөгийн санхүүжилтийг олгохоор болсон юм. Ийнхүү Хөгжлийн банкны Төлөөлөн Удирдах зөвлөлд зээл олгох зохих зөвшөөрлийг олголоо. Жижиг, дунд үйлдвэрийг 200 тэрбум төгрөгөөр санхүүжүүлснээр 2016 онд үйлдвэрлэлийн салбарт 10 мянга орчим ажлын байр шинээр нэмэгдэж, 4682 орчим ажлын байр хадгалагдаж, үйлдвэрийн салбарт өсөлт гарч, экспортыг нэмэгдүүлэх ач холбогдолтой гэж салбарын яам үзэж байна. Мөн дотоодын нийт бүтээгдэхүүний хэмжээ жил бүр тодорхой хувиар өсөх боломжтой бөгөөд аймаг орон нутгийн эрэлт хэрэгцээнд тулгуурласан жижиг, дунд үйлдвэрлэлийг хөгжүүлэх замаар төвлөрлийг бууруулж, шилжилт хөдөлгөөнийг сааруулах ач холбогдолтой юм байна.

М.Дэлгэрмаа

Холбоо барих: delgermaa.m@bloombergtvmongolia.com

minjma.g@bloombergtvmongolia.com