Лалын босогчдод барьцаалагдсан иргэдээ суллахын тулд Япон болон Йорданы Засгийн газар хамтран ажиллахаар болсон байна. Японы сэтгүүлч Кенжи Гото болон өнгөрсөн оны сүүлээр лалын босогчдод барьцаалагдсан Йорданы нисэгч Муат аль Касасбехийг аврахаар хамтран ажиллаж байгаагаа Японы Гадаад хэргийн сайдын орлогч мэдэгджээ. Лалын босогчдын эсрэг дайралт хийх олон улсын ажиллагаанд оролцож байсан Йорданы Нисэх хүчний ахлах дэслэгч Муат аль Касасбехийн онгоц 12 дугаар сард Сирийн хойд хэсэгт осолдож, тэрбээр босогчдод барьцаалагдсан байна. Харин Японы хувьд лалын босогчид энэ сарын 20-ны өдөр тус улсын хоёр иргэнийг барьцаалсан дүрс бичлэгээ цахим сүлжээгээр цацаж, Японы Засгийн газраас 200 сая ам.доллар шаардсан юм. Үүнээс хэдэн өдрийн дараа Японы барьцаанд байгаа хоёр иргэний нэгнийх нь амийг хөнөөсөн бичлэгийг мөн цахим ертөнцөд тавьсан байна. Үүнтэй холбоотойгоор Японы Засгийн газар мэдэгдэл хийж барьцаанд байгаа иргэнийхээ амийг аврахын тулд шаардлагатай бүхий л арга хэмжээг авна гэдгээ мэдэгдсэн юм.

О.Анударь

Холбоо барих: anudari.o@bloombergtvmongolia.com

minjma.g@bloombergtvmongolia.com