Японы аж үйлдвэр салбарын гарц энэ оны хамгийн эрчимтэй өсөлтөө есдүгээр сард үзүүллээ. Наймдугаар сард 1.9 хувиар буурч байсан энэхүү үзүүлэлт өнгөрсөн сард 2.7 хувиар огцом өссөн байна. Азийн хоёр дахь том эдийн засагтай улсын жижиглэн худалдаа болон үйлдвэрлэгчдийн үйл ажиллагаа сайжирсан нь энэ удаагийн өсөлтөд голлон нөлөөлсөн гэж Японы Засгийн газрын тайланд дурджээ. Тус улсын Засгийн газар өнгөрсөн дөрөвдүгээр сард худалдааны татвараа нэмсэн нь эдийн засгийн үзүүлэлтүүд болон Японы бизнес эрхлэгчдийн үйл ажиллагаанд багагүй нөлөөлсөн байна. Гэхдээ тус улсын аж үйлдвэрийн гарц есдүгээр сард өсөлттэй гарсан нь худалдааны татварын сөрөг нөлөө бага зэрэг буурч байгааг илтгэж байна гэж шинжээчид үзжээ. Мөн Японы Ерөнхий сайд Шинзо Абэ худалдааны татвараа дахин нэмэгдүүлж магадгүй гэсэн хүлээлттэй байгаа юм. Гэвч энэ нь тус улсын эдийн засагт хүндээр тусахаас гадна олон эрсдэлийг бий болгоно гэж Японы Төв банкны тэргүүн Харуко Курода мэдэгджээ.

О.Анударь

Холбоо барих: anudari.o@bloombergtvmongolia.com

minjma.g@bloombergtvmongolia.com