7-р сард Монгол улсын эрчим хүчний систем 365.2 сая кВт.цаг цахилгаан хэрэглэсэн нь өмнөх онтой харьцуулахад 2.1 хувиар буурсан үзүүлэлт боллоо. Нийт хэрэглээний 94.6 хувийг дотоодын боловсруулалтаар хангасан бол импортоор 19.3 сая кВт.цаг цахилгаан худалдан авсан байна.

Дотоодын дулааны цахилгаан станцуудаас Дулааны 4-р цахилгаан станц нийт үйлдвэрлэлийн 74.5 хувийг бүрдүүлж, хангасан бол үлдсэн хэсгийг 2, 3-р болон Дархан, Эрдэнэтийн дулааны цахилгаан станцууд үйлдвэрлэсэн байна. Харин сэргээгдэх эх үүсвэр буюу Салхитын цахилгаан станц нийт үйлдвэрлэлийн 3.5 хувийг нийлүүлжээ.

Экспортын цахилгаан эрчим хүч төлөвлөсөн хэмжээнээс нэмэгдсэн нь томоохон хэрэглэгч болох “Дарханы төмөрлөгийн үйлдвэр” компани үйл ажиллагаагаа зогсоосноос шөнийн бага ачаалал 30 орчим МВт-аар буурсантай холбоотой гэж Эрчим хүчний яам мэдээллээ. Мөн уулын баяжуулах “Эрдэнэт” үйлдвэр дээр өдөрт 1-2 тээрэм зогссон нь үүнд бас нөлөөлсөн байна. Үүнтэй холбоотойгоор импортын эрчим хүчний хэмжээ төлөвлөсөн болон 2014 оны гүйцэтгэлтэй харьцуулахад бага байж, хэмнэлт гарсан болохыг онцоллоо.

Эдгээрээс гадна Дулааны 3-р цахилгаан станцын экспортын эрчим хүчний хэмжээ ихэссэнтэй холбоотойгоор төлөвлөгөөнөөс 17.5 сая кВт.цагаар дутуу цахилгаан эрчим хүч түгээжээ. Дархан ДЦС ТӨХК нь 0.66 сая кВт цагаар цахилгаан эрчим хүч дутуу түгээж ажилласан болохыг Эрчим хүчний яам мэдээллээ.

Цаашдаа өвөлжилтийн бэлтгэл ажлыг хангах хүрээнд засгийн газраас тогтоол гарч, нөөцөд авах тоног төхөөрөмжийн санхүүжилтийг шийдэхээр болсон. Мөн өвлийн ид ачаалал эхлэхээс өмнө Улаанбаатар хотын зүүн бүсийн дулааны хэрэгцээг хангах Амгалан дулааны станцыг ашиглалтад оруулах төлөвтэй байна.

З.Энхболор

Холбоо барих: enkhbolor.z@bloombergtvmongolia.com

anu.g@bloombergtvmongolia.com