Үйл ажиллагаагаа сэргээгээд удаагүй байгаа “Эрдэнэс Тавантолгой” компани нийт өр зээлийнхээ 47 хувийг барагдуулсан талаар Уул уурхайн сайд мэдэгдсэн байна. Мөн тэрбээр “Эрдэнэс Тавантолгой” компани санхүүгийн хүндрэлээ шийдвэрлэж худалдан авагчдынхаа тоог нэмэгдүүлэх нэг хувилбар нь Баруун Цанхийн олборлолтыг эхлүүлэх явдал гэдгийг онцолжээ. Одоогийн байдлаар тус компани Хятадын төрийн өмчит “Chalco”-д 186 сая ам.доллар, Голомт банкинд 34 сая ам.доллар, туслан гүйцэтгэгч дотоодын аж ахуйн нэгжүүдэд 37 сая ам.долларын тус тус өртэй байгаа аж. Нийтдээ 481 сая ам.долларын зээлтэй байсан “Эрдэнэс Тавантолгой” компани 418 тэрбум төгрөгийг Хүний хөгжил санд төвлөрүүлсэн нь 2012 онд санхүүгийн хүндрэлд орох гол шалтгаан болсон гэж салбарын сайд тайлбарласан байна. Тиймээс санхүүгийн хүндрэлээ даван туулахын тулд компанийн удирдлагууд зардлаа танах бодлого баримталж эхэлсэн бөгөөд уурхайн ээлжийн горимд өөрчлөлт оруулж, ажилчдыг онгоцоор бус автобусаар тээвэрлэх болсноор жилдээ нэг тэрбум гаруй төгрөгийн хэмнэлт гарах боломж бүрджээ. Мөн компанид ажиллаж байсан гадаадын хоёр захирлыг ажлаас чөлөөлснөөр жилдээ нэг тэрбум гаруй төгрөг, оффиссын байрыг нэг цэгт төвлөрүүлснээр 600 сая төгрөгийг тус тус хэмнэх болсон байна. Мөн түлш зарцуулалтад тавих хяналтыг чангаруулж, нэг куб метр уулын цулд зарцуулдаг шатахууныг 0.34 литрээр багасгаж 0.7 литр болгосноос гадна өнгөрсөн онд нэг тонн нүүрс тутамд 62.4 ам.доллар байсан нийт зардалыг энэ онд 5.3 ам.доллараар бууруулна гэж Уул уурхайн сайд мэдээллээ. Ийнхүү зардлаа танах хэд хэдэн шат дараатай ажлуудыг хийгээд байгаа ч энэ оны хоёрдугаар улирлын ханшаар “Эрдэнэс Тавантолгой” компани нэг тонн нүүрсээ 55.93 ам.доллараар “Chalco”-д нийлүүлснээр нэг тонн тутмаасаа 1.17 ам.долларын алдагдал хүлээж байгаа аж. Тиймээс цаашдаа тээврийн автомашины 30 хувийг чиргүүлтэй явуулж, автозамын түрээсийн үнийг багасгаснаар тонн нүүрсний тээврийн зардлыг 3-4 ам.доллараар бууруулах боломж нээгдэх гэнэ. Мөн уурхай дээр гүний гааль байгуулж, тээвэр, ложистикийн зардлыг таван орчим хувиар бууруулах боломжтой бол төмөр зам ашиглалтад орвол тээврийн зардал 60 хувиар буурах юм байна. 

Э.Нарантунгалаг 

Холбоо барих: narantungalag.e@bloombergtvmongolia.com