Монгол Улс 2013 оны эхний улиралд өмнөх оны мөн үеэс 1.3 хувиар их буюу 3.4 сая тонн нүүрс экспортолсон байна. Нүүрсний экспортын үнийн дүнг мөнгөн хэлбэрт шилжүүлвэл  2012 оны эхний улирлаас 41 хувь буюу 158.1 сая ам.доллараар бага мөнгө бүрдүүлжээ.Түүнчлэн экспортлосон нүүрсний 99.99 хувийг БНХАУ руу, үлдсэн 0.01 хувь буюу 35 мянган ам.долларын нүүрсийг ОХУ руу экспортолсон байна. Мөн молибдений хүдрийн экспортын хэмжээ өөрчлөгдөөгүй хэдий ч үнийн дүн нь 15 хувиар буурчээ. Үүнээс гадна жоншны хувьд экспортолсон хэмжээ нь 27 хувиар, үнийн дүн нь 19.8 хувиар буурсан ч цайрын экспорт нэмэгдсэн байна. Түүнчлэн төмрийн хүдрийн экспортын хэмжээ 24 хувиар багассан ч үнийн өсөлтөөс шалтгаалж мөнгөн дүн нь 14 хувиар нэмэгджээ. Харин Монгол Улсын төсвийн орлогод томоохон хувь эзэлдэг зэсийн экспортын хувьд тоо хэмжээ нь төдийлөн нэмэгдээгүй ч үнийн өсөлтөөр 5.1 хувиар илүү хэмжээний орлого хуримтлуулжээ. Үндэсний статистикийн хорооны мэдээлснээр Монгол Улстай гадаад худалдаа хийдэг орнуудын 5.7 хувь нь уул уурхайн бүтээгдэхүүн авдаг ч энэ нь Монгол Улсын нийт экспортын 86.8 хувийг эзэлж байна. 

263.3 сая ам.долларын эрдсийн бүтээгдэхүүн экспортлов 

Өнгөрсөн сард Монгол Улс нийт зургаан улсад 263.3 сая ам.долларын эрдсийн бүтээгдэхүүн экспортолсон нь өмнөх оны мөн үеэс 19 хувиар буурсан үзүүлэлт болжээ. Эрдсийн бүтээгдэхүүнийг төрлөөр нь ангилбал цайр, зэс, төмрийн хүдрийн баяжмалын экспорт өнгөрсөн оны эхний улирлаас 5.1-29 хувиар нэмэгдсэн байна. Харин чулуун нүүрс, молибден, жоншны баяжмалын экспорт өмнөх оны мөн үеэс 15-41 хувиар буурчээ. Хэрэв эрдсийн бүтээгдэхүүнийг экспортолсон орноор нь харвал, уул уурхайн бүтээгдэхүүний нийт экспортын 97 хувийг БНХАУ руу нийлүүлж байгаагаас цайр, зэс, төмрийн хүдрээ 100 хувь урд хөршдөө экспортолж байна. Харин дотоодод олборлосон нүүрсээ ОХУ, БНХАУ-д нийлүүлж байгаа бол БНСУ, БНХАУ, Мексик гэсэн гурван улсад молибден экспортолдог байна. Мөн жоншны хүдэр болон баяжмалаа урд, хойд хоёр хөршөөс гадна Украйн, Герман зэрэг орон руу экспортолж байгаа тухай Үндэсний статистикийн хорооны тайланд дурдсан байна.