Нэгдүгээр сарын 15-ны өдрийн 11.00 цагийн байдлаар нийслэлд 12 хүнд “коронавирус”-ийн халдвар илэрч, Улаанбаатар хотод халдварын тоо 664 боллоо. Эдгээр нь бүгд өмнө нь батлагдсан тохиолдлын ойрын хавьтлаас илэрчээ.

Шинээр илэрсэн найман тохиолдол нь Баянзүрх дүүргийн 12, 17 дугаар хорооны оршин суугч байсан байна. Эдгээр тохиолдлууд бүгд хяналтад орсон, тусгаарлалтад байжээ.

Мөн Хан-Уул дүүргийн Цагдаагийн хэлтсийн ажилтнаас халдвар илэрсэнтэй холбоотойгоор тус хэлтсийн 100 гаруй ажилтныг хяналтад аван 10 хүнийг тусгаарлаад байгааг мэдээллээ.

Одоогийн байдлаар нийт ойрын хавьтлын 1135 хүнийг тусгаарлан ажиглалтад аваад байгаа юм байна. “Коронавирус”-ийн халдвар авсан өвчтөний ойрын хавьталд тооцогдсон хүмүүсийн 95 хувьд, хоёрдогч хавьтлуудын дөрөв орчим хувьд нь халдвар илэрч байгааг Эрүүл мэндийн яам тодотголоо.

Үүнээс гадна “коронавирус”-ийн халдварын сэжигтэй шинж тэмдэг илэрвэл эхний ээлжид эмнэлэгт бус холбогдох тусламжийн утсаар холбоо барьж тусламж, зөвлөгөө авах хэрэгтэйг анхаарууллаа. Сүүлийн байдлаар халдвартай хүмүүс олон эмнэлгээр дамжин үйлчлүүлсний улмаас тархалт хүрээгээ тэлээд байгаа юм. Өнөөдрийн байдлаар улсын хэмжээнд нийт батлагдсан тохиолдол 1491 болоод байгаагаас 6.3 хувь нь эмнэлэг, эрүүл мэндийн ажилчид байна.

Б.Энхжин

Холбоо барих: enkhjin.b@bloombergtvmongolia.com

minjma.g@bloombergtvmongolia.com