Нэгдүгээр сарын 13-ны өдрийн 11.00 цагийн байдлаар нийслэлд 13 хүнд “коронавирус”-ийн халдвар илэрч, Улаанбаатар хотод халдварын тохиолдол 643 болсныг Эрүүл мэндийн яам мэдээллээ. Эдгээр нь бүгд өмнө нь батлагдсан тохиолдлын ойрын хавьтлаас илэрсэн байна.

Сүүлийн үед нийслэлд бүртгэгдсэн голомтуудаас Баянзүрх дүүргийн 17 хорооных идэвхтэй байгааг тодотголоо. Бусад кластер голомтод халдвар нэмж бүртгэгдээгүй. Одоогийн байдлаар дотоодын халдварын тохиолдол 969, улсын хэмжээнд батлагдсан нийт тохиолдол 1469 байна.

Үүнээс гадна хүн амынхаа 60 гаруй хувийг “коронавирус”-ийн эсрэг вакцинжуулалтад хамруулахаас 20 хувийг “COVAX”-аас авахаар төлөвлөсөн талаар Эрүүл мэндийн яам мэдээллээ.

“COVAX” нь олон улсын олон талт хамтын ажиллагааны механизм юм. Өнөөдрийн байдлаар Монгол Улсад “коронавирус”-ийн эсрэг гурван нэрийн вакцинд яаралтай нөхцөлд хэрэглэх зөвшөөрлийг олгоод байна.

Б.Энхжин

Холбоо барих: enkhjin.b@bloombergtvmongolia.com

minjma.g@bloombergtvmongolia.com