Аравдугаар сарын 2, 3, 4-ний өдөр буюу сүүлийн гурав хоногт ХӨСҮТ-ийн вирус судлалын хоёр лаборатори, ЗӨСҮТ-ийн вирус судлалын лаборатори, Дархан-Уул аймгийн вирус судлалын салбар лабораторид нийт 1823 хүний сорьцод шинжилгээ хийхэд 1822 хүнд “COVID-19” илрээгүйг Эрүүл мэндийн яам мэдээллээ.

Харин аравдугаар сарын дөрөвний өдөр Нурсултан-Улаанбаатар чиглэлийн тусгай үүргийн нислэгээр ирсэн нэг хүний сорьцод шинэ төрлийн "коронавирус" илэрч, Монгол Улсад батлагдсан тохиолдол 314 боллоо.

Өнөөдрийн байдлаар батлагдсан 314 тохиолдлоос 307 нь эдгэрээд байгааг ХӨСҮТ онцоллоо. Эдгэрсэн 307 хүнээс арав нь сувиллын хяналтад, гурав нь гэрийн ажиглалтад тусгаарлагдаж байгаа бол 294 хүний ажиглалт, тандалтын хугацаа дууссан байна.

ХӨСҮТ-д эмчлэгдэж байгаа долоон хүнээс таван хүний биеийн байдал хөнгөн, хоёр хүн нь хүндэвтэр байгаа ажээ.

Холбоо барих: minjma.g@bloombergtvmongolia.com