Нэгдүгээр сарын 14-ний 11.00 цагийн байдлаар 10 хүнд “коронавирус”-ийн халвдар илэрч, улсын хэмжээнд батлагдсан нийт тохиолдол 1479 болсныг Эрүүл мэндийн яам мэдээллээ. Үүнээс ес нь нийслэлд бүртгэгдсэнээр Улаанбаатар хотод халдварын тохиолдол 652 боллоо.

Эдгээр нь бүгд өмнө нь батлагдсан тохиолдлын ойрын хавьтлаас илэрчээ. Сүүлийн өдрүүдэд нийслэлийн гурван гол голомттой холбоотой ойрын хавьталд тооцогдсон хүмүүсийн давтан шинжилгээнээс халдвар илэрч байна.

“Коронавирус”-ийн халдвар авсан хүн эмнэлзүйн шинж тэмдэг эхлэхээс өмнөх 24-48 цагийн хугацаанд вирусийг гадаад болон дотоод орчинд маш идэвхтэй тарааж байдаг талаар ХӨСҮТ мэдээллээ. Иймд шинж тэмдэг илрэхээс өмнөх хоёр хоног болон илэрснээс хойших 14 хоногийн хугацаанд батлагдсан тохиолдолтой 1.5 метрээс дотогш зайд 15 минутаас дээш хугацаанд уулзсан хүмүүсийг ойрын хавьталд тооцож байна гэсэн юм.

Үүнээс гадна Афганистанаас ирсэн нэг энхийг сахиулагч халдвартай нь тогтоогджээ. Ингэснээр гадаад улсаас зөөвөрлөгдсөн тохиолдлын тоо 410 болж байна.

Б.Энхжин

Холбоо барих: enkhjin.b@bloombergtvmongolia.com

minjma.g@bloombergtvmongolia.com