Эмчилгээ хийлгэх зорилгоор гадаадад аялсан Монгол Улсын иргэд хамгийн багадаа жилд дунджаар 58 сая ам.долларыг зарцуулдаг гэх тооцоог Монголбанк гаргасан байна. Эмчилгээний зардлын 94 хувь нь БНСУ, БНХАУ, Энэтхэг, Тайландад шингэжээ. 2011-2014 оны хооронд дээрх улс руу Монгол Улсаас 13.6 мянган иргэн эмчилгээ хийлгэхээр явсан бөгөөд нэг эмчлүүлэгчийн дундаж зардал 3182 ам.доллар гэж үзсэн байна. Энэ оны эхний долоон сарын байдлаар Монгол Улсын 3800 гаруй иргэн БНХАУ-д, 2500 орчим иргэн БНСУ-д, 400 гаруй иргэн Тайландад, 51 иргэн Энэтхэг улсад эмчилгээ хийлгэсэн гэх таамаг тооцоог Монголбак гаргажээ. Элэг шилжүүлэн суулгах, зүрхний хагалгаа, тархи мэдрэлийн хагалгаа зэрэг өндөр өртөгтэй хагалгааг ихэвчлэн Энэтхэг улсад хийлгэдэг байна. Энэ утгаараа эмчилгээний дундаж зардал нь бусад улстай харьцуулахад харьцангуй өндөр байгаа юм. Тодруулбал энэ оны эхний долоон сард Энэтхэгт эмчлүүлсэн нэг иргэн дунджаар 22 мянган ам.долларын зардал гаргажээ. Харин Тайландад хамгийн бага өртөгөөр эмчилгээ хийлгэдэг байна. Монголбанк Тайландын Төв банк, эмнэлэгийн төлөөлөгчийн газрын мэдээлэлд үндэслэн нэг эмчлүүлэгч дунджаар 2800 гаруй ам.долларын зардал гаргадаг гэх тооцоо гаргажээ. Эрүүл мэндийн хөгжлийн төвийн судалгаагаар Тайланд улсын хамгийн том Бумрунгранд эмнэлэгт 2011 онд Монгол Улсын 1254 иргэн эмчлүүлжээ. Харин БНСУ-ыг зорьж буй таван монгол иргэн тутмын нэг нь эмчилгээ хийлгэх зорилгоор тус улсыг зорьдог аж. БНХАУ-д суугаа ЭСЯ-ны мэдээлснээр 2013 онд тус улсад эмчилгээ хийлгэсэн иргэдийн 79 хувь нь Хөх хотод эмчилгээ хийлгэжээ.

Э.Нарантунгалаг

Холбоо барих: narantungalag.e@bloombergtvmongolia.com

minjma.g@bloombergtvmongolia.com