Энэ оны хоёрдугаар улиралд Японы эдийн засаг таамаглаж байснаас бага хувиар өсчээ. Ингэснээр Ерөнхий сайд Шинзо Абэ худалдааны татварыг нэмэгдүүлэх төлөвлөгөөгөө хэрэгжүүлэх эсэх нь эргэлзээтэй болж байна. Японы дотоодын нийт бүтээгдэхүүний жилийн өсөлт нэгдүгээр улиралд 3.8 хувьтай гарч байсан бол хоёрдугаар улиралд энэ өсөлт буурч 2.6 хувь болсон байна. Харин зах зээлийн хүлээлт 3.6 хувиар өснө гэсэн таамагтай байсан аж. Айл өрхүүдийн худалдан авалт, хөрөнгө оруулалт, экспорт зэрэг хүчин зүйлүүд хоёрдугаар улиралд Японы эдийн засгийн өсөлтөд голлох нөлөөг үзүүлсэн байна. Тухайлбал, дэлхийн гурав дахь том эдийн засгийн 60 хувийг бүрдүүлдэг хүчин зүйл болох айл өрхүүдийн худалдан авалт өмнөх улирлаас 0.8 хувиар өсчээ. Эдийн засгийн өсөлт хүлээлтэд хүрээгүй учраас ирэх дөрөвдүгээр улирлаас эхлэн худалдааны татварыг хоёр шатлалтайгаар нэмэгдүүлэх төлөвлөгөөг эргэн харж, өөр хувилбарыг хэрэгжүүлэхийг Ерөнхий сайдад зөвлөж магадгүй гэж шинжээчид үзэж байна. Одоогоор худалдааны татварыг гурван хувиар нэмэгдүүлж найман хувь болгохоор төлөвлөөд байгаа юм. Мэргэжилтнүүд ирэх есдүгээр сарын есөнд хоёрдугаар улирлын эдийн засгийн үзүүлэлтийн залруулсан хувилбарыг мэдээлнэ. Үүний дараа Японы Ерөнхий сайд Шинзо Абэ худалдааны татварын талаар шийдвэрээ гаргах ажээ. Өнгөрсөн долоо хоногт тус улсын Төв банкны тэргүүн Харухико Курода татварыг нэмэгдүүлэх шийдвэрийг хойшлуулах ёсгүй гэсэн байр суурьтай байгаагаа илэрхийлжээ. Мөн дефляцийг арилгаж, худалдааны татварыг нэмэгдүүлэх ажлыг нэгэн зэрэг хэрэгжүүлэх боломжтой гэж мэдэгдсэн байна. Харин Ерөнхий сайд Шинзо Абэгийн хувьд эдийн засгийг тогтвортой өсгөхийн тулд мөнгөний зөөлөн бодлого баримталж байгаа юм. Мөн өсөлтийн стратегийг хэрэгжүүлэх замаар бизнесийн орчныг сайжруулж, дотоодын компаниудыг дэмжихээр зорьж байна. Шинзо Абэгийн хэрэгжүүлсэн бодлогын нөлөөгөөр иений ханш сулраад байгаагийн зэрэгцээ он гарснаас хойш “Topix” индекс 33 хувиар өсөөд байгаа ажээ.

Э.Анхбаяр

Холбоо барих:ankhbayar.e@bloombergtvmongolia.com

minjma.g@bloombergtvmongolia.com