Эдийн засагт үүсээд байгаа хүндрэлтэй байдлаас гарах гарцуудыг иргэдийн дунд хэлэлцүүлж, санал авч шийднэ гэж Ерөнхий сайд Ч.Сайханбилэг мэдэгдлээ. Түүний харж байгаагаар Монгол Улсын өмнө эдийн засгийн хүндрэлээс гарах хоёр гарц байгаа аж. Нэг талаас “Оюу Толгой", “Таван Толгой" зэрэг томоохон төслүүдээ урагшлуулах, нөгөө талаас зардлаа танаж, хэрэглээгээ багасгах. Эдгээр гарцуудын талаарх иргэдийн байр суурь, сонголтыг иргэдийн дунд хэлэлцүүлж, иргэдийн саналыг ирэх мягмар гарагийн 22.00 цаг хүртэл 15151111 тусгай дугаар дээр хүлээн авахаар төлөвлөсөн байна. Түүний хувьд ирэх хоёр жилийн хугацаанд халамжийн хавтгайрсан бодлогоос татгалзах ажлыг хийхээр төлөвлөж байгаагаа Монголын үндэсний олон нийтийн телевизэд өгсөн ярилцлагынхаа үеэр онцолжээ. Энэ үеэр тэрбээр Монгол Улсын төсвийн 62 хувийг халамжийн зардал бүрдүүлж байгааг онцолсон юм. Харин бусад төрлийн урсгал зардал 19 хувийг, хөрөнгө оруулалтын зардал ердөө долоон хувийг бүрдүүлж байгаа аж. Хэдийгээр халамжийн бодлогыг өөрчилж чадаагүй боловч энэ оны батлагдсан төсвийг Ерөнхий сайд "боломжийн" гэж тодорхойлсон юм. Төсөвт шинэ обьектуудыг зогсоосон, “Хөгжлийн банк"-ны санхүүжилтийг нэмж тусган, нэг төсөвтэй болсон зэрэг нь Засгийн газар болон УИХ-ын хийсэн томоохон алхам гэж тэрбээр үзжээ. Харин Ерөнхий сайдын албаа авснаас хойших хоёр сарын хугацаанд дөрвөн жил зогссон хайгуулын ажлыг эхлүүлсэн, концесс болон гадаадын хөрөнгө оруулалтаар сургуулиуд нэмж барихаар болсон, хөдөлмөр нийгмийн гурван талт хэлэлцээрийг байгуулсан, “Таван Толгой"-ийн хэлэлцээ эхэлсэн зэрэг иргэд, бизнес эрхлэгчдийн дунд хүлээлт үүсгээд байсан олон шийдвэр гаргасан гэж үзэж байгаагаа илэрхийллээ. Мөн ирэх сард Япон улстай эдийн засгийн түншлэлийн гэрээ байгуулах тухай асуудлыг онцлов. Ерөнхий сайдын хувьд энэхүү гэрээ нь Монгол Улсын үйлдвэрлэгчид томорч, гадаад зах зээлд гарах гарц болох боломжтой гэж үзэж байгаа юм байна. Монгол Улсын Ерөнхий сайд Ч.Сайханбилэг албан тушаалаа авснаас хойш анх удаа ярилцлага өгсөн юм.

Б.Дуламхорлоо

Холбоо барих: dulamkhorloo.b@bloombergtvmongolia.com

minjma.g@bloombergtvmongolia.com