Ч.Сайнханбилэгийг Ерөнхий сайдаар нэр дэвшүүлэх болон шинэ Засгийн газарт орох эсэх асуудлаар МАН-ын Удирдах Зөвлөл хуралдсан ч тодорхой шийдэлд хүрээгүй байна. Тухайлбал Ч.Сайханбилэгийг дэмжих боломжгүй гэж МАН-ын Удирдах Зөвлөлийн гишүүдийн олонх нь үзжээ. Харин одоо УИХ дахь Ардын намын бүлэг энэхүү асуудлыг үргэлжлүүлэн хэлэлцэх үлдээд байна. “Шударга ёс" эвслийн бүлэг даваа гарагт энэ асуудлыг хэлэлцээд Ч.Сайханбилэгийг Ерөнхий сайдад нэр дэвшүүлэхийг дэмжсэн юм. Мөн Ардчилсан намын УИХ дахь бүлэг Үндэсний Зөвлөлдөх Хорооны шийдвэрээ харгалзаж Ч.Сайханбилэгийг нэр дэвшүүлэхийг дэмжээд байна. Хуулийн дагуу Ерөнхий сайдын нэрийг өргөн барих хугацаа энэ лхагва гарагт дуусна. Үүнтэй холбоотойгоор энэ долоо хоногт Ч.Сайханбилэгийг Ерөнхий сайдаар томилох тухай асуудлыг хэлэлцэх хүлээлт үүсээд байна. УИХ-ын дарга З.Энхболд өнөөдөр буюу мягмар гарагт УИХ-ын чуулганы нэгдсэн хуралдааныг зарлаж Ерөнхий сайдыг томилох тухай асуудлыг хэлэлцэнэ гэж мэдэгдээд байгаа юм. Ч.Сайханбилэгийн хувьд Ерөнхий сайдаар томилогдвол "Засгийн газрын ажил хувийн хэвшилд тулгуурлаж хэрэгжих болно" гэж мэдэгдээд байна. Мөн Н.Алтанхуягийн Засгийн газрын хэрэгжүүлж байсан томоохон төсөл хөтөлбөрүүдийг үргэлжлүүлж, эдийн засгийн хямралтай тэмцэх чиглэлд анхаарах болно гэдгээ онцоллоо. Ерөнхий сайдын асуудал бүрэн шийдэгдвэл Засгийн газрын бүтцийн тухай асуудал яригдана. Харин шинэ Засгийн газрын бүтэц ямар байхаас хамаарч төсөвт тодотгол хийх тухай асуудал сөхөгдөж болзошгүй байна. Учир нь УИХ-аас ирэх оны төсвийг аравдугаар сард өргөн барьсан шинэ бүтцээр буюу 13 яамтай байхаар баталсан. Шинэ Засгийн газрын хувьд энэхүү бүтцээр явах эсэх нь одоогоор тодорхойгүй байгаа юм. Гэхдээ Сар шинийн баяраас урьтаж ирэх оны төсөвт тодотгол хийхийг УИХ-ын дарга З.Энхболд мэдээллээ. Мөн ирэх оны төсвийн тухай хуульд нийцүүлж, илүү хэмнэлттэй, үр ашигтай бүтцэд шилжих шаардлагатай байгааг УИХ-ын Төсвийн байнгын хорооны дарга Ц.Даваасүрэн мэдээлсэн юм.

Д.Хаш-эрдэнэ

Холбоо барих: khasherdene.d@bloombergtvmongolia.com

minjma.g@bloombergtvmongolia.com