Хятадын Чинхуандао боомт дээр 5500 кило калори илчлэгтэй нүүрсний үнэ нэг тонн тутамдаа 565-580 юань болж буурсан нь 11 дүгээр сарын 10-наас хойших хамгийн доод үнэ болж байна. Харин агуулах дахь нүүрсний нөөц даваа гарагийн байдлаар 8.33 сая тонн болж өссөн тухай Хятадын Нүүрсний тээвэр, түгээлтийн ассоциациас мэдээллээ. Хятадын нүүрсний хамгийн том боомт гэж тооцогддог Чинхуандао нь хүчин чадлаараа Оросын боомтуудаас илүү байдаг төдийгүй Монголын нүүрсний экспортод томоохон нөлөөтэй газар юм. Хятадын “Шинхуа” компанийн хувьд Тавантолгойн нүүрсийг тус боомт руу тээвэрлэхээр бэлтгэж байгаа бөгөөд өнгөрсөн онд Тавантолгойн бүлэг ордод үйл ажиллагаа явуулдаг “Эрдэнэс Тавантолгой”, “Энержи Ресурс”, орон нутгийн өмчит “Тавантолгой” компаниас нүүрс худалдаж авахаар тохиролцоод байгаа. Харин тээвэрлэлтийн талаар Хятадын Нүүрсний тээвэр, түгээлтийн ассоциацийн шинжээч Ли Чаолин “Нүүрс тээвэрлэх зардлын хувьд Монголоос Чинхуандао хүрэх нь Шансигаас Чинхуандао хүрэхтэй бараг адил өртөгтэй. Хэрэв Шинхуа компани Монгол дахь төмөр замын ажлаа гүйцэтгэвэл Монголоос Чинхуандао хүртэл нүүрс тээвэрлэх зардал тодорхой хэмжээгээр буурна” гэж үзэж мэдэгдсэн байна. 

Т.Элиса 

Холбоо барих: Elisa.t@bloombergtvmongolia.com

Munkhjin.ts@bloombergtvmongolia.com