Өршөөл үзүүлэх тухай хуульд тавьсан Монгол Улсын Ерөнхийлөгчийн хоригийг энэ мягмар гарагт УИХ-ын чуулганы нэгдсэн хуралдаанаар хэлэлцэх товтой байна. Харин өнгөрсөн ням гарагт Монгол Улсад Байнгын ажиллагаатай Парламент байгуулагдсаны 25 жилийн ойд зориулсан Улсын Их Хурлын Хүндэтгэлийн хуралдаан боллоо. Хуралдааны үеэр Төрийн тэргүүн “Монгол Улс төвийг сахисан бодлого баримталж, түүнийгээ олон улсын түвшинд зарлана” гэж мэдэгдлээ. Мөн Ерөнхий сайд танхимаа өөрөө бүрдүүлж, Парламентыг томилгооноос салгах хэрэгтэй байгааг онцолсон юм. "Энэ намрын чуулганаар Монгол Улсын хөгжлийн урт хугацааны бодлогын баримт бичгийг батлах нь чухал" гэж Улсын Их Хурлын дарга З.Энхболд мэдэгдэв. Мөн төсвийн төслийг Парламентаар хэлэлцэх, батлах, төсвийн гүйцэтгэлд хяналт тавих бүх процессыг Парламентын үйл ажиллагааны жилийн турш тасралтгүй үргэлжлэх нэгэн гол чиглэл болгон хэвшүүлэх хэрэгтэй байгааг онцолсон юм.

Дашрамд дурдахад Улсын Бага Хурал болон зургаан удаагийн Парламентад давхардсан бус тоогоор 326 хүн сонгогдон ажилласны дотор 7 болон 6 удаа сонгогдсон гишүүн хоёр, хоёр удаа сонгогдсон гишүүн 68, нэг удаа сонгогдсон гишүүн 206 байгаа болохыг хүндэтгэлийн хуралдааны үеэр УИХ-ын дарга танилцууллаа.

Э.Нарантунгалаг

Холбоо барих: narantungalag.e@bloombergtvmongolia.com

minjma.g@bloombergtvmongolia.com