Манай орны нутаг дэвсгэрийн 80 гаруй хувьд цасан бүрхүүл тогтсоноос, 15 аймгийн 50 суманд цасан зудтай, 20 аймгийн 120 суманд зудархуу байгаа талаар Шадар сайд Ц.Оюунбаатар “Сайдын цаг” уулзалтаар мэдээллээ. Тиймээс малчдад улсын нөөцийн өвснөөс үнэгүй болон 50 хувийн хөнгөлөлттэй үнээр олгохоор шийдвэрлээд байгаа ажээ. Улсын хэмжээнд 21 аймгийн 330 сум, нийслэлийн 4 дүүргийн 149 мянган малчин өрхөд 56 сая орчим мал өвөлжинө. Үүнээс гадна Засгийн газраас 2016 оныг “Хэрэглэгчийн жил”-ээр зарласантай холбоотой Хэрэглэгчийн эрхийг хамгаалах тухай хууль болон хэрэглэгчийн эрхтэй холбогдох багц хуулиудад шинэчилсэн найруулга хийх, нэмэлт өөрчлөлт оруулах замаар эрх зүйн орчныг боловсронгуй болгохоор төлөвлөж, хуулийн төслүүдийг энэ оны нэгдүгээр улиралд багтаан УИХ-д өргөн барих юм байна. Түүнчлэн энэ онд болох Олимпийн наадамд баг тамирчдаа оролцуулах бэлтгэлийг хангуулахад Эрүүл мэнд, спортын яам анхаарч ажиллаж байгаагаа онцоллоо.