Цар тахлын үед технологийн дэвшлүүд бизнесийг хөнгөвчлөх шинэ шийдэл болж байна. Бэлэн мөнгө шинэ төрлийн “коронавирус”-ийн халдвар тархах хүчин зүйлд тооцогдож байгаа учраас БНХАУ, АНУ, БНСУ-ын Төв банк мөнгөн тэмдэгтээ гүйлгээнд оруулахын өмнө ариутгах арга хэмжээ авч байна. Мөн цахим хэтэвч төлбөр тооцоог хялбар гүйцэтгэх боломж олгож байгаа юм.

Хэдий тийм боловч Дэлхийн банкны тооцооллоор дэлхий даяар нийт 1.7 тэрбум хүн банкны үйлчилгээ авч чадахгүй хэвээр байгаа юм. Үүнээс гадна цар тахлын үеийн дараагийн трендээр зайнаас ажиллах шийдлийг нэрлэж болно. Үр дүнд нь цаг зав хэмнэхээс гадна илүү уян хатан ажиллах нөхцөлөөр хангагдаж байна. Нөгөө талаас багийн ажиллагаа, харилцаа холбоо дутагдаж байгааг “Buffer.com” сайт шинэ тайландаа дурджээ.

Дөрөвдүгээр сарын дунд үе гэхэд дэлхий даяар 191 улс сургуулийн үйл ажиллагааг зогсоогоод байгаа юм. Энэ нь 1.57 тэрбум хүүхдийг хамарч байна. Хэдий тийм боловч виртуал реалити, 3D хэвлэлт, хиймэл оюунд суурилсан робот багш зэрэг технологийн дэвшлүүд хоосон орон зайг нөхөж байна гэж Дэлхийн эдийн засгийн чуулган онцолжээ. Үүгээр ч зогсохгүй дэлхий нийтийг хамарсан хөл хорио, хязгаарлалтын арга хэмжээний үед нийлүүлэлтийн гинжин хэлхээ 4.0 гэх нэр томьёог идэвхтэй ярих болсон юм.

Аж үйлдвэрийн дөрөв дэх хувьсгалын гол технологиуд болох их өгөгдөл, үүлэн тооцоолол, юмсын интернэт, блокчэйн зэрэг нь илүү тогтвортой, бас найдвартай нийлүүлэлтийн хэлхээний менежментийн системийг бий болгож байна.

Б.Ариунболд | @Ariunbold_Bat

Холбоо барих: ariunbold.b@bloombergtvmongolia.com

minjma.g@bloombergtvmongolia.com