“COVID-19” цар тахлын тархалтаас урьдчилан сэргийлэх үүднээс улс орнууд орон гэргүй хүмүүсээ анхаарч эхэллээ. Учир нь тэднийг халдварт өртөх, мөн тархаах өндөр эрсдэлтэй бүлэгт багтаан үзэж байгаа юм.

АНУ-ын Лас Вегас хот орон гэргүй хүмүүсээ задгай талбайд түр байрлуулж байна. Хотын захиргаа олон төрлөөр ашиглах боломжтой эдгээр түр байруудыг цэнгэлдэх хүрээлэн, үзэсгэлэнгийн газар, уулзалтын өрөөнөөс хавьгүй давуу талтай гэж үзэж байгаа аж. Мөн эдгээр газруудыг шаардлагатай тохиолдолд эмнэлгийн зориулалтаар ашиглахаар нөөцөлж байгаа талаар мэдээлжээ. Лас Вегас хотод ойролцоогоор 5500 орон гэргүй хүн байдаг гэсэн тооцоо байна. Шинээр зассан энэхүү түр байранд өнгөрсөн амралтын өдрүүдэд 200 гаруй хүнийг авчирсан байна. Энэ баасан гараг хүртэл орон гэргүй хүмүүсийг нэмж хүлээж авах боломжтой гэж зохион байгуулагчид нь мэдээлжээ.

Харин Германд хөл хорионы үед орон гэргүй хүмүүс орогнох газаргүй болсон учраас Майнц хотын зочид буудлуудад байрлуулахаар болоод байгаа юм.

Үүнээс гадна Энэтхэгийн Барейлли хотод хүмүүсийг бөөнд нь ариутгаж байна. Тухайлбал: хөл хориог үл харгалзан гадуур явж байгаа иргэдийг автобусны буудалд бөөнд нь ариутгахыг тус хотын захиргаа цагдаа нарт үүрэг болгожээ.

"Бүдүүлэг" гэмээр энэ бичлэг цахим орчинд тарсны дараа шүүмжлэл дагуулж байгааг орон нутгийн хэвлэлүүд онцолж байна. Энэтхэгт одоогоор “COVID-19”-ийн 1500 гаруй тохиолдол бүртгэгдсэн, нас барсан хүний тоо 45 хүрээд байгаа юм.

Б.Ариунболд | @Ariunbold_Bat

Холбоо барих: ariunbold.b@bloombergtvmongolia.com

minjma.g@bloombergtvmongolia.com