Аравдугаар сарын 7, 8-ны өдөр буюу сүүлийн хоёр хоногт ХӨСҮТ-ийн вирус судлалын хоёр лаборатори, ЗӨСҮТ-ийн вирус судлалын лаборатори, Дархан-Уул аймгийн вирус судлалын салбар лабораторид нийт 1248 хүний сорьцод шинжилгээ хийхэд “COVID-19”-ийн халдвар илрээгүйг Эрүүл мэндийн яам мэдээллээ.

Тухайлбал: аравдугаар сарын долоонд ирсэн 213 энхийг сахиулагч, есдүгээр сарын 19-нд Истанбул-Улаанбаатарын онгоцоор ирсэн 246 хүний давтан шинжилгээ, есдүгээр сарын 24-ны өдөр Сөүл-Улаанбаатар онгоцоор ирсэн 262 хүний давтан шинжилгээ, Франкфурт-Улаанбаатар чиглэлийн нислэгээр ирсэн 205 хүний давтан шинжилгээ, аравдугаар сарын зургааны өдөр Замын-Үүд боомтоор орж ирсэн 20 хүний шинжилгээ, есдүгээр сарын 18, 22, 23-ны өдөр Замын-Үүд боомтоор орж ирсэн 56 хүний давтан шинжилгээ, ХӨСҮТ-д сэжигтэй гэж тусгаарлан ажиглагдаж байгаа хоёр хүний давтан шинжилгээнд "коронавирус" илрээгүй байна. Мөн Алтанбулагийн боомтоор орж ирсэн ачаа тээврийн 56 жолооч, сайн дураар шинжилгээ өгсөн есөн хүн, тандалтын зорилгоор санамсаргүй түүврээр авсан 41 хүний сорьцод "COVID-19"-ийн халдвар илрээгүйг Эрүүл мэндийн яам онцоллоо.

Монгол Улсад батлагдсан 315 тохиолдлоос 308 нь буюу 98 хувь нь эдгэрээд байна. Эдгэрсэн 308 хүнээс арав нь сувиллын хяналтад, гурав нь гэрийн ажиглалтад тусгаарлагдаж байгаа бол 295 хүний ажиглалт, тандалтын хугацаа дуусжээ.

ХӨСҮТ-д эмчлэгдэж байгаа долоон хүнээс зургаан хүний биеийн байдал хөнгөн, нэг нь хүндэвтэр байгааг Эрүүл мэндийн яам мэдээллээ.

Холбоо барих: minjma.g@bloombergtvmongolia.com