Аравдугаар сарын 12,13-ны өдөр ХӨСҮТ-ийн вирус судлалын хоёр лаборатори, ЗӨСҮТ-ийн вирус судлалын лаборатори, Дархан-Уул аймгийн вирус судлалын салбар лабораторид нийт 1352 хүний сорьцод шинжилгээ хийхэд хоёр хүнээс “COVID-19” илэрснийг Эрүүл мэндийн яам мэдээллээ.

Тухайлбал: аравдугаар сарын 10-ны өдөр Токио-Улаанбаатар чиглэлийн тусгай үүргийн нислэгээр ирсэн 30 настай эрэгтэй, 20 настай эмэгтэй хоёр хүн “COVID-19”-ийн халдвар авсныг тогтоосон байна.

Үүнээс гадна есдүгээр сарын есний өдөр Алтанбулаг боомтоор орж ирсэн ОХУ-ын иргэн, 53 настай эрэгтэй, ачаа тээврийн жолооч эдгэрч, дараагийн шатны хяналт, сувилалд шилжжээ.

Өнөөдрийн байдлаар Монгол Улсад батлагдсан 320 тохиолдлоос 311 нь буюу 97 хувь нь эдгэрээд байна. Эдгэрсэн 311 хүнээс арав нь сувиллын хяналтад, дөрөв нь гэрийн ажиглалтад тусгаарлагдаж байгаа бол 297 хүний ажиглалт, тандалтын хугацаа дуусжээ.

ХӨСҮТ-д эмчлэгдэж байгаа есөн хүнээс долоон хүний биеийн байдал хөнгөн, хоёр нь хүндэвтэр байгааг Эрүүл мэндийн яам мэдээллээ. Одоогийн байдлаар ХӨСҮТ-д сэжигтэй тохиолдлоор 29 хүн тусгаарлагдаж байгаа ажээ.

Үүнээс гадна тусгаарлан ажиглах байрнаас ХӨСҮТ-д шилжээд байсан нэг эмэгтэй лхагва гарагийн өглөө амаржиж, хүүтэй болсон байна.

Холбоо барих: minjma.g@bloombergtvmongolia.com