ОХУ-аас гадагш чиглэх хөрөнгийн урсгал 17 улирал дараалан өссөн дүнтэй гарлаа. АНУ болон барууны эдийн засгийн хоригийн улмаас энэ он гарсаар хөрөнгө оруулагчид ОХУ-аас ойролцоогоор 85 тэрбум ам.долларыг эргүүлэн татжээ. Өөрөөр хэлбэл ОХУ-ын Төв банкны мэдээлснээр 6-9 дүгээр сарын хооронд бизнесийнхэн нийт 13 тэрбум ам.долларыг эргүүлэн татсан байна. Украйны зөрчилдөөн хурцдаж эхэлсэн 2014 оны эхний улиралд энэхүү хэмжээ 48.6 тэрбум ам.долларт хүрч байжээ. Үүний улмаас ОХУ-ын эдийн засаг сүүлийн таван жилийн хугацаанд хоёр дахь удаагаа хямарч магадгүй болоод байгаа юм. Учир нь хөрөнгийн урсгалаас гадна рублийн ханш ам.долларын эсрэг түүхэн доод түвшиндээ хүрч суларчээ. Мөн инфляци нь найман хувьд хүрч өссөн байна. Долдугаар сард Украйны нутагт болсон “MH17" нислэгийн онгоцны ослын улмаас ОХУ болон барууны орнуудын харилцаа улам хурцдаад байгаа юм. Барууны орнууд энэ хэрэгт ОХУ-ыг буруутгаж байгаа ч ОХУ үүнийг гүтгэлэг гэжээ. Мөн тус улс барууны орнуудын эдийн засгийн хоригт хамгийн ихээр өртсөн эрчим хүчний салбараа сэргээхийн тулд газрын тосны зарим ордуудаа дуудлага худалдаагаар худалдахаар болсон байна. Одоогоор ОХУ газрын тосны илэрсэн нөөцийнхөө 40 орчим хувийг л ашиглаж байгаа ажээ.

Д.Хаш-эрдэнэ

Холбоо барих: khasherdene.d@bloombergtvmongolia.com

minjma.g@bloombergtvmongolia.com