Эдийн засгийн байнгын хорооны лхагва гарагийн хуралдаанаар хөрөнгийн албан татварын тухай хуулийн төслийн анхны хэлэлцүүлгийг хийнэ. Төслийг татварын тухай хуулийг төрөлжүүлэх, хэрэгжилтийг хялбаржуулах зорилгоор санаачлаад байгаа юм. Өөрөөр хэлбэл энэхүү хуулийн төсөл нь үл хөдлөх хөрөнгө, буу, мал, авто тээвэр болон өөрөө явагч хэрэгсэлд ногдуулдаг татварыг нэгтгэхэд чиглэгджээ. Ингэснээр өмнөх чиглэл тус бүрд хамаарах долоон хуулийн заалтад өөрчлөлт орох юм. Харин шинэ хуулийн төсөлд үл хөдлөх хөрөнгийн татварын зохицуулалт анхаарал татаж байна. Учир нь гурав буюу түүнээс дээш тооны үл хөдлөх хөрөнгө эзэмшдэг хүмүүст татвар ногдуулахаар тусгажээ. Хэрэв хууль батлагдвал үл хөдлөх хөрөнгийн байршил, зориулалт, хэмжээ, зах зээлийн эрэлт ба нийлүүлэлтийг харгалзан Аймаг, Нийслэлийн иргэдийн төлөөлөгчдийн хурал 0.6-3.0 хувийн татварын тогтоох үүрэг хүлээх юм. Монгол Улсын хувьд иргэдийнхээ сууцыг татвараас чөлөөлж ирсэн ч сүүлийн жилүүдэд зөвхөн ашиг олох зорилгоор орон сууцыг олноор нь өмчлөх иргэд олширсон учраас Сангийн яам, Хууль зүйн яамнаас хамтран энэхүү хуулийн төслийг өргөн барьсан байна. Харин нийтийн эзэмшлийн барилга байгууламж дээрх хуульд хамаарахгүй юм. Мөн газар тариалангаас бусад аж ахуйн зориулалтаар иргэдэд өмчлүүлсэн газрыг нийслэлд 30 хувиар, аймгийн төвд 70 хувиар, сумын төв, тосгонд 85 хувиар албан татвараас чөлөөлөхөөр төлөвлөж байгаа ажээ. Харин газар тариалангийн зориулалтаар иргэдэд өмчлүүлсэн газрыг 90 хувиар хөнгөлөх юм байна.

М.Дэлгэрмаа

Холбоо барих: delgermaa.m@bloombergtvmongolia.com

minjma.g@bloombergtvmongolia.com