МХБ-ийн I ангилалд бүртгэлтэй “Хөвсгөл алтан дуулга” ХК 2020 оны эхний хагас жилд нийт 3.6 тэрбум төгрөгийн борлуулалт хийж, 0.9 тэрбум төгрөгийн цэвэр ашигтай ажилласнаа тайлагналаа. Тайлант хугацаанд компани энэ оны цэвэр ашгийн төлөвлөгөөний 68 хувийг хэрэгжүүлсэн байна. Үүнээс гадна тус компани 3.3 мянган тонн буудай тээрэмдэж, гурил 2.7 мянган тонн, тэжээлийн хивэг 0.6 мянган тонныг тус тус үйлдвэрлэсэн.цар тахлын үед компани урьдчилан сэргийлэх чиглэлээр бэлэн байдлын нөөцийг бүрдүүлснээ онцолсон байна. Мөн үр тарианы агуулахууд, үйлдвэрийн байранд ээлжит ариутгал, халдваргүйжүүлэлтийн ажил хийсэн байна. Компанийн нэгж хувьцааны ханш он гарснаас хойш 14.3 хувь буурч 598 төгрөг болсныг МХБ-ийн арилжааны мэдээллээс харж болохоор байна. Хувьцааны ханшаар илэрхийлэх зах зээлийн үнэлгээ нь 9.4 тэрбум төгрөгөөр хэмжигдэж байна.

Мөн ангиллын “Түмэн шувуут” ХК энэ оны эхний хагас жилийн байдлаар борлуулалтын орлого нь өмнөх оны мөн үеэс 12.6 хувь өсөж 11.7 тэрбум төгрөг болсныг тайлагнасан байна. Мөн цэвэр ашиг нь хоёр тэрбум төгрөг болсон байна. Тайлант хугацаанд компанийн сангасны органик бордооны үйлдвэр ашиглалтад орж, хатааж, ариутгасан бордоо үйлдвэрлэж эхэлсэн. Мөн VI сард их булаг дахь шувууны шинэ аж ахуй анхны 40,000 дэгдээхийгээ хүлээн авч үйл ажиллагаагаа эхлүүлсэн. Он гарснаас хойш тус компанийн нэгж хувьцааны ханш 4.8 хувь буурч 154.39 төгрөг болсон байна. Хувьцааны ханшаар илэрхийлэх зах зээлийн үнэлгээ нь 30.8 тэрбум төгрөгөөр хэмжигдэж байна.

Б.Энхжин

Холбоо барих: enkhjin.b@bloombergtvmongolia.com

uyanga.m@bloombergtvmongolia.com