БНХАУ-ын дөрөвдүгээр сарын хэрэглээнийн үнийн индекс 2.4 хувийн өсөлттэй гарсан гэж Хятадын Үндэсний статистикийн товчооноос мэдээлжээ. Үүнээс өмнө Блумбэргээс эдийн засагчдын дунд явуулсан судалгаагаар дээрх үзүүлэлтийг 2.3 хувийн өсөлттэй гарна гэж таамаглаж байсан юм. Хэдийгээр хэрэглээнийн үнийн индекс өсөлттэй гарсан ч өнгөрсөн сард үйлдвэрлэлийн үнийн индекс 2.6 хувийн уналттай гарчээ. Учир нь 2013 оны эхний улиралд тус улсын үйлдвэрлэлийн бүтээгдэхүүний гарц буурснаас эдийн засгийн өсөлт саарсан нь үйлдвэрлэлийн үнийн индекс бууралттай гарахад голлох нөлөөг үзүүлсэн гэж шинжээчид таамаглаж байна. Үүнтэй холбогдуулж Хятадын “Bocom international”-ийн эдийн засагч Ли "Энэ жил инфляци өсөхгүй" гэсэн таамаглал дэвшүүлснээ мэдэгдээд байгаа аж. Түүнчлэн өнгөрсөн сард Хятадын хүнсний бүтээгдэхүүний үнэ гуравдугаар сараас дөрвөн хувиар өссөн нь инфляци 2.4 хувийн өсөлттэй гарахад голлох нөлөөг үзүүлсэн байна. Харин тээвэр, харилцаа холбооны зардал эсрэгээрээ буюу бууралтаа хадгалсан эерэг дүнтэй гараад байгаа юм байна. Үүнээс өмнө “Mirae Assets”-ийн судалгаагаар энэ онд Хятадын зарим хотуудад шингэрүүлсэн хийний хэрэглээний үнэ 20 хувиар өсөх төлөвтэй байгааг анхааруулж байжээ.

Б.Батманлай 

Холбоо барих: batmanlai.b@bloombergtvmongolia.com