2017 оны жилийн эцсийн байдлаар дотоодод интернет хэрэглэгчдийн тоо 2.9 саяд хүрээд байна. Үүнээс суурин интернет хэрэглэгчдийн тоо 285 мянга болсныг Харилцаа холбооны зохицуулах хорооны тайлангаас харж болохоор байна. Өөрөөр хэлбэл сүүлийн зургаан жилд суурин интернет хэрэглэгчдийн тоо бараг хоёр дахин өсөөд байна. Хэрэглэгчдийн төрлөөр задлан үзвэл 266 мянган өрх суурин интернет хэрэглэж байгаа аж. Харин төсвийн байгууллага 3591, аж ахуйн нэгж байгууллагын хэрэглэгчийн тоо 15 мянга 436-д хүрчээ. Хэрэглээний хурдаар нь харвал 2-5 мегабитын интернет хэрэглэгчид дийлэнх буюу 69 хувийг бүрдүүлж байна.

“Mobinet” компани “Dedicated”, “Economy”, “Soho” гэсэн гурван төрлийн үйлчилгээний багцыг байгууллагын хэрэглэгчдэд санал болгож байгаа талаараа мэдээллээ. Багцаасаа хамаараад “public” хаяг, мөн 1-5 хүртэлх IP хаяг дагалддаг байна. Холболтын тухайд шилэн кабель буюу оптик холболт, радио холболт, “VSat” сансрын холболт гэсэн гурван төрлийн үйлчилгээг санал болгож байгаа аж.

Мөн аж ахуйн нэгж, байгууллагууд 5-6 мегабитын хурдтай интернет ихээр сонирхдог талаар “Сitinet” ХХК мэдээллээ. Үнийн хувьд сард дунджаар 655 мянган төгрөгөөр үйлчилгээгээ хүргэдэг байна.

Харин үндэсний оператор “GMobile” компани албан байгууллагуудад 1-50 мегабитын хурдны интернет санал болгож байгаа бөгөөд үнэ нь хурднаасаа хамаараад 165 мянгаас зургаан сая 751 мянган төгрөгийн хооронд хэлбэлзэж байгаа ажээ.

Б.Ариунболд

Холбоо барих: ariunbold.b@bloombergtvmongolia.com

minjma.g@bloombergtvmongolia.com