Нийт хүн амын 70 хувь нь интернэтэд холбогдсон Монгол Улсын хувьд нийгмийн сүлжээний харилцааг зохицуулах тусгайлсан хууль, тогтоомж одоогоор байхгүй байна.

Цахим халдлагатай тэмцэх үндэсний төв байгуулах заалт бүхий цахим мэдээллийн аюулгүй байдлын тухай хууль, өгөгдөл хамгаалах тухай хуулийг батлах шаардлагатай гэж Цахим бодлогын түр хороо үзэж байгаа аж. Хууль эрх зүйн орчныг шинэчлэхээс гадна гар утасны дугаарыг бүртгэлжүүлснээр Төрийн үйлчилгээг цахимаар авах, нийгмийн сүлжээний орчинд гар утасны дугаараа бүртгүүлэх зэрэг нөхцөлүүд хангагдана гэж үзэж байгаа юм. Тухайлбал: 2016 оны байдлаар 650 мянган бүртгэлгүй гар утасны дугаар байсан бол энэ тоо 2019 онд 42 мянга болж буурчээ.

Үүнээс гадна “Facebook” компанитай хамтын ажиллагааны үр дүнд хууль бус контентын талаарх гомдол, хүсэлтийг түргэн шийдвэрлэх "Ногоон суваг"-ийг Монгол Улсад нээлээ. Шууд харилцах энэхүү цахим сувгийн хүрээнд олон нийтийн аюулгүй байдалд аюул учруулж болохуйц тухайн контент болон бүртгэлтэй хэрэглэгчийн хувийн аккаунтыг устгах, түдгэлзүүлэх зэрэг арга хэмжээ авах юм байна. Түүнчлэн цаашид 2020 оны УИХ-ын сонгууль болон Монгол Улсын хуулийн хэрэгжилтийг нийгмийн сүлжээнд хангуулахад “Facebook” компанитай хамтран ажиллахаар төлөвлөжээ.

“Facebook” компанийн Хонгконг, Тайвань, Монгол Улс болон Олон нийтийн бодлого хариуцсан захирал Жорж Чен

Олон улсын туршлагуудыг харвал ХБНГУ нийгмийн сүлжээний хуурамч мэдээ, суртал ухуулгын эсрэг “Network Enforcement Act”-ийг 2018 оноос хэрэгжүүлж эхэлжээ. Хуулийн хүрээнд олон нийтийн сүлжээнд зохисгүй агуулга нийтэлсэн хувь хэрэглэгчийг таван сая хүртэлх еврогоор, компаниудыг 50 сая хүртэлх еврогоор торгох юм байна. Хууль хэрэгжиж эхэлсэн эхний жилдээ хэрэглэгчдээс 714 гомдол ирсэн аж.

Фридрих-Эбертийн сангийн Суурин төлөөлөгч Нийлс Хегевиш

Харин Европын Холбоо терроризмыг дэмжсэн агуулгуудыг нийгмийн сүлжээ сайтуудаас буулгахад анхаарч эхлээд байна. Тухайлбал: хэт туйлшрагч, террористуудыг дэмжсэн контентуудыг нэг цагийн дотор устгаагүй тохиолдолд нийгмийн сүлжээний сайтуудад мөнгөн торгууль хүлээлгэх болжээ.

Үүнээс гадна дата болон хэрэглэгчийн мэдээллийн аюулгүй байдлыг хангах “GDPR” хуулийг хэрэгжүүлж эхэлсэн байна.

Австралийн тухайд "зохисгүй" агуулгуудыг хориглох шинэ хуулийг өнгөрсөн дөрөвдүгээр сард баталсан байна. Хууль зөрчсөн тохиолдолд нийгмийн сүлжээний компаниудыг торгоод зогсохгүй, технологийн компанийн удирдлагуудад гурав хүртэлх жилийн хорих ял оноохоор тусгажээ.

Харин мөнгөн торгууль нь компанийн олон улсын орлогын 10 хүртэлх хувьтай тэнцэхээр тогтоосон байна. Энэ оны гуравдугаар сард Шинэ Зеландад галт зэвсэгтэй этгээд 17 минутын турш “Facebook”-ээр “live” хийсний дараа дээрх зохицуулалтыг хийжээ.

Б.Ариунболд

Холбоо барих: ariunbold.b@bloombergtvmongolia.com

minjma.g@bloombergtvmongolia.com