“СOVID-19” цар тахал намжсаны дараа хүмүүс эргэн аялж эхлэх тэр үед хувийн орон зай шинэ тансаглал болж аяллын салбарын тансаг зэрэглэлийн бизнесүүд эрчээ авна гэж “Luxury Daily” үзэж байна.

Учир нь чинээлэг үйлчлүүлэгчид олон нийт бужигнасан газраас дайжин ганцаараа байхыг эрхэмлэж, хайртай дотнын хүмүүстэйгээ цугларах орон зайг эрэлхийлэх болжээ. Тиймээс дарвуулт завь, хувийн тийрэлтэт онгоцоор аялж, тусгай үйлчилгээтэй байр, орон сууц түрээслэх, аль болох олон нийтээс хол байрлах зочид буудал, аяллын маршрут сонгох зэрэг нь тренд болох юм байна.

Нью-Йорк хотын ачаа, тээш хадгалалтын үйлчилгээ үзүүлдэг хамгийн том сүлжээ болох “Luggagehero”-оос хийсэн шинэ судалгаагаар цар тахлын намжсаны дараа аялагчдын 25 хувь нь зорчигч тээврийн нислэг, нийтийн тээврийн хэрэгслээр үйлчлүүлэхээс зайлсхийнэ гэж гарчээ.

Мөн саяхан “Full-Time Travel” компанийн судалгаанд оролцсон хүмүүсийн 79 хувь нь гэр бүл эсвэл найз, нөхөдтэйгээ аялахаар төлөвлөсөн гэж хариулсан байна.

Үүнээс гадна хүмүүсийн гадаадад гарах, аялах хэрэгцээ өсөн нэмэгдэж байгаа энэ үед тансаг зэрэглэлийн амралтын газруудад эрэлт өсөж байгаа нь хэдийн мэдрэгдэж эхэлжээ. Тухайлбал: зөвхөн гишүүнчлэлтэй хүн үйлчлүүлэх эрхтэй, 400 гаруй амрагч хүлээн авдаг АНУ-ын “Exclusive Resorts”-ийн тансаг зэрэглэлийн сууцанд энэ зун захиалга өгсөн хүний тоо 1100 давсан байна.

Түүнчлэн амралтын хугацаанд тухайн давхрыг бүхэлд нь түрээслэх үйлчилгээ санал болгодог үл хөдлөхийн компаниуд болон зочид буудлуудын захиалга өсөх төлөвтэй байна. Тухайлбал: Монте Карлод байрлах “Metropole” зочид буудал үйлчлүүлэгчдэдээ Францын алдарт интерьер дизайнер Жак Гарсиагийн шийдлийг нь гаргасан буудлын хамгийн дээд давхрыг бүхэлд нь захиалах боломж олгож байна. Түүнчлэн нисдэг тэргээр хүргэж өгөх үйлчилгээ багтжээ.

Б.Энхжин

Холбоо барих: enkhjin.b@bloombergtvmongolia.com

minjma.g@bloombergtvmongolia.com