ХБНГУ-ын Холбооны Ерөнхийлөгч Иоахим Гаук Монгол Улсад Төрийн айлчлал хийхээр хүрэлцэн ирээд байна. Энэхүү айлчлал нь Монгол Улсад анхны чөлөөт сонгууль явуулсны 25 жилийн ой болон хоёр Герман улс нэгдсэний 25 жилийн ой тохиож буй үед болж байгаагаараа онцлог болж байна. Төрийн айлчлалын үеэр өнөөдөр ХБНГУ-ын Холбооны Ерөнхийлөгч Иоахим Гаук Монгол Улсын Ерөнхийлөгч Ц.Элбэгдоржтой уулзаж, албан ёсны хэлэлцээ хийнэ. Мөн айлчлалын шинэчилсэн хөтөлбөрт хоёр улсын Ерөнхийлөгч хэлэлцээ хийсний дараа Афганистанд ИСАФ арга хэмжээний хүрээнд хамтран үүрэг гүйцэтгэсэн Монголын зэвсэгт хүчний дайчид болон Германы Бундесверийн сургагч офицеруудтай дурсгалын зураг авахуулна. Үүний дараа Монгол Улсын Ерөнхий сайд Ч.Сайханбилэг ХБНГУ-ын Холбооны эдийн засаг, эрчим хүчний яамны Төрийн нарийн бичгийн дарга Матиас Махниг нар гэрээнд гарын үсэг зурах юм. Мөн Монгол Улсын Ерөнхий сайд Холбооны Ерөнхийлөгчид бараалхана. Монгол Улс болон ХНБГУ 1974 онд албан ёсоор дипломат харилцаа тогтоосон бөгөөд 2008 онд ХБНГУ, Монгол Улсын иж бүрийн түншлэлийн тухай хамтарсан мэдэгдэлд хоёр улсын Ерөнхийлөгч нар гарын үсэг зурж, харилцааны шинэ шат нээгдсэн гэж үздэг. Үүний дараа 2011 онд Германы Канцлер Ангела Меркель Монгол Улсад айлчлах үеэр хоёр улсын Засгийн газар хооронд Ашигт малтмал, аж үйлдвэр, технологийн салбарт хамтран ажиллах тухай хэлэлцээрт гарын үсэг зурж байжээ. Уг хэлэлцээрийн хүрээнд байгуулагдсан ажлын хэсгийн IV хуралдаан өнөөдөр зохион байгуулагдана. Харин хамгийн сүүлд Монгол Улсын Ерөнхийлөгч, Холбооны Канцлер Меркель нар “ITB Berlin 2015” олон улсын аялал, жуулчлалын үзэсгэлэнгийн үеэр хийсэн хамтарсан мэдэгдэлд Монгол Улсын Ерөнхийлөгч эдийн засгийн иж бүрэн харилцаатай улсын хувьд Эдийн засгийн хамтын ажиллагааны гэрээг Монгол-Германы хооронд байгуулах хүсэлт тавьж байгаагаа илэрхийлж байв. Энэ үеэр ХБНГУ-ын Канцлер Ангела Меркель “Хоёр орны улс төрийн харилцаа идэвхтэй байгаа ч эдийн засгийн хамтын ажиллагаа идэвх муу байгааг” онцолж байсан юм. Тиймээс энэ удаагийн Холбооны Ерөнхийлөгчийн айлчлалаас хүлээх гол хүлээлт эдийн засгийн хамтын ажиллагааны түвшинд ямар ахиц гаргах вэ гэдэг асуудал болж байна.

О.Одгэрэл

Холбоо барих: odgerel.o@bloombergtvmongolia.com

minjma.g@bloombergtvmongolia.com