ХБНГУ-ын Ерөнхийлөгч Иоахим Гаукийн Монгол Улсад хийж буй Төрийн айлчлал өнөөдөр дуусна. ХБНГУ-ын Холбооны Ерөнхийлөгчийн айлчлалын үеэр бизнесийн салбарт олон гэрээ хэлэлцээрүүд хийгдэж байна. Тухайлбал Эрчим хүчний яам, ХБНГУ-ын “M&P” группийн охин компани болох “Дезерт Солар Пауэр Вуан” компанитай харилцан ойлголцлын санамж бичиг байгууллаа. Сайншандад 30 мвт-ын Нарны эрчим хүчний цахилгаан станц барих энэхүү төслийг эрчимжүүлэх чухал гэрээ болж байгааг тус компанийн зүгээс мэдээллээ. Мөн Эрчим хүчний яам, ХБНГУ-ын “Туссен” групптэй метан хий боловсруулах төсөлд хамтран ажиллах санамж бичиг байгууллаа. Санамж бичигт “Туссен” групп судалгаа, ТЭЗҮ боловсруулах, мэргэжилтэн боловсон хүчин бэлтгэх ажлыг өөрсдийн хөрөнгөөр хэрэгжүүлэх, Эрчим хүчний яам зөвшөөрөл олгох, үйлдвэр барих орчинг бүрдүүлэхэд дэмжлэг үзүүлэх, төсөл хэрэгжүүлэх Монголын талын компанийг сонгож өгөх, хоёр тал хамтран үйлдвэр байгуулах хөрөнгө оруулалтыг босгох ажлыг хариуцахаар тусгасан байна. Нүүрс боловсруулж нийлэг байгалийн хий /метан/ гаргах үйлдвэрийг байгуулах талаар санамж бичигт гарын үсэг зурах талаар яригдаж байсан боловч байгалийн хийн хангамжийн талаар Монгол Улсын байдал тодорхойгүй байгаагаас хойшлогдсоор ирсэн гэж үздэг. Энэ онд Эрчим хүчний тухай хуульд нэмэлт өөрчлөлт орж, байгалийн хий, метаны хангамжийн талаарх зохицуулалттай болсонтой холбогдуулан ийм үйлдвэрийг байгуулах нөхцөл боломж бүрдээд байгаа тухай Эрчим хүчний яамнаас мэдээлжээ. Хоёр улсын бизнес эрхлэгчдийн хооронд зэсийн баяжмал болон тос тосолгооны салбарт хоёр томоохон хэлцэл хийгдлээ. “Монголын алт” компани Германы “Aurubis” компанитай зэс нийлүүлэх гэрээг 15 жилийн хугацаатай байгуулж байна. Харин Тос тосолгооны үйлдвэр байгуулах асуудлаар Германы талтай хэлэлцээрт хүрсэн тухай “Сод Монгол” компаниас мэдээллээ. ХБНГУ-ын Холбооны Ерөнхийлөгч Хархорин дахь археологийн малтлагын "Монгол-Германы Хархорин экспедиц" төслийн үйл ажиллагаатай танилцсанаар айлчлал өндөрлөнө.

О.Одгэрэл

Холбоо барих: odgerel.o@bloombergtvmongolia.com

minjma.g@bloombergtvmongolia.com