Ардчилсан Намын гүйцэтгэх зөвлөл МАН-тай байгуулсан "Харилцан итгэлцэл, хамтын ажиллагааны" гэрээг цуцлахаар шийдсэнийг УИХ дахь Ардчилсан Намын бүлэг 100 хувь дэмжлээ. Хэдийгээр Монгол Ардын Намтай байгуулсан гэрээгээ цуцлах шийдвэр Ерөнхий сайдыг эзгүйд гарсан боловч бүлгийн хуралдаанд Ерөнхий сайд Ч.Сайханбилэг болон намын дарга, УИХ-ын дарга З.Энхболд нар байлцсан байна. Ардын Нам эдийн засгийн чухал ач холбогдолтой хуулиудыг ажлын хэсгүүд дээр гацаасан гэж УИХ дахь Ардчилсан Намын бүлгийн дарга Б.Гарамгайбаатар хуралдааны үеэр мэдэгдлээ. Мөн энэ асуудлаар МАН-ын бүлэг хуралдсан байна. Ардын Намын хувьд Засгийн газрын тогтвортой байдал хөрөнгө оруулагчдын Монгол Улсад итгэх итгэлд чухал нөлөөтэй гэдгийг онцолж байгаа юм. Гэхдээ Ардчилсан Нам сайд нарыг нь огцруулах байр сууриа хадгалбал Засгаас гарахад асуудалгүй гэж УИХ-ын гишүүн С.Дэмбэрэл мэдэгдэв. Өнгөрсөн оны сүүлээр Ардчилсан Намаас МАН болон “Шударга ёс” эвсэлд хамтрах хүсэлт хүргүүлж, "Шийдлийн" гэх тодотголтой Засгийн газрыг байгуулснаас хойш долоон сарын хугацаа өнгөрөөд байна. Энэ хугацаанд Монгол Ардын Нам зөвхөн томилгоо хийхэд гол анхаарлаа хандуулснаас гадна зарим хуулийн төслийг санаатайгаар гацаасан гэж Ардчилсан Нам дүгнэжээ. Харин Монгол Ардын Намын хувьд хуулийн төслүүд батлагдахгүй хугацаа алдаж байгаа нь Ардчилсан Нам дотроо байр суурийн зөрчилдөөнтэй байгаатай холбоотой гэж үзэж байгаа юм. Энэхүү тогтоол гарсантай холбогдуулан Засгийн газрын бүрэлдэхүүнд өөрчлөлт оруулах асуудлыг 2015 оны долдугаар сарын 10-ны дотор хууль тогтоомжийн хүрээнд шийдвэрлэн Гүйцэтгэх зөвлөлд танилцуулахыг Хууль тогтоох болон Гүйцэтгэх засаглалд ажиллаж байгаа ардчилсан намын гишүүдэд үүрэг болгоод байна. Харин Ерөнхий сайд Ч.Сайханбилэг дотооддоо тулга тойрсон улс төртэйгээ зууралдахгүйгээр, Засгийн газар том эрх ашгийн төлөө гаргах ёстой шийдвэрээ гаргаж ажиллана гэж мэдэгдээд байгаа юм. Мөн энэ талаар Монгол Ардын Намын дарга М.Энхболд байр сууриа илэрхийлсэн юм. Тэрбээр “Өнгөрсөн оны арваннэгдүгээр сард УИХ-ын дарга З.Энхболд, Ерөнхий сайд Ч.Сайханбилэг нар МАН-ыг Засгийн газарт хамтран ажиллаач гэсэн урилгыг ирүүлсэн. Мөн манай намын Бага хурлын гишүүдэд хандан Ерөнхий сайдын илгээсэн ил захидал хүртэл бий. Энэ саналуудыг үндэслэж МАН-ын Бага хурал Засгийн газарт хамтран ажиллах шийдвэр гаргасан. Харамсалтай нь хагас жилийн дараа Ардчилсан Намын дээд байгууллага нь манай намыг Засгийн газраас гаргах шийдвэр гарлаа. Ийм шийдвэр ийм богино хугацаанд гарна гэж бодоогүй” гэсэн юм.

Б.Батманлай

Холбоо барих: batmanlai.b@bloombergtvmongolia.com

minjma.g@bloombergtvmongolia.com