Өнгөрсөн оны байдлаар Монгол Улсын хэмжээнд 331 сум, сууринг холбосон 25,909 км шилэн кабелийн сүлжээ тавигдаад байгаагаас гадна 181 сум, суурин сансрын холбооны сүлжээнд холбогджээ. Ийнхүү дамжуулах сүлжээ өргөжин тэлж байгаагийн зэрэгцээ тус салбарын хөрөнгө оруулалт нэмэгдэж 102 орчим тэрбум төгрөгт хүрсэн байна. Өнөөдрийн байдлаар интернэтийн зах зээлд 85 байгууллага “Dial up”, “DSL” болон шилэн кабель ашиглан аж ахуйн нэгж, иргэдэд үйлчилгээ хүргэж байна. Тэр ч утгаараа орон даяар 200 мянга орчим интернэтийн холболттой цэг үүсч хэрэглэгчдэд үйлчилгээгээ түгээж эхэлжээ. Харин шуудангийн үйлчилгээний хувьд “Монгол шуудан” Төрийн өмчит хувьцаат компаниас гадна 54 аж ахуйн нэгж, байгууллага шуудангийн үйлчилгээний тусгай зөвшөөрөл эзэмшиж байна. Сүүлийн дөрвөн жилд хөдөө орон нутагт шуудан хүргэлтийн шинэ чиглэл нэмэгдэж бүх аймгийн төвд долоо хоногт 3-6 удаа, 329 сумд 1-3 удаа тус тус шуудан хүргэдэг болжээ. Үүнээс гадна өнөөдрийн байдлаар 80 гаруй кабелийн телевиз үйл ажиллагаа эрхэлж байгаатай зэрэгцэн хэрэглэгчдийнх нь тоо жилээс жилд өсч байна. Тодруулбал, Монгол Улсын хэмжээнд бүртгэлтэй кабелийн телевиз хэрэглэгчдийн тоо өнгөрсөн онд 378 мянгад хүрсэн нь 2011 оноос 52.4 хувиар өссөн үзүүлэлт болжээ.

М.Дэлгэрмаа 

 Холбоо барих: delgermaa.m@bloombergtvmongolia.com