2014 оны эхний хагас жилд Хөдөө аж ахуйн бирж 99 удаагийн арилжаагаар 450.3 тэрбум төгрөгийн хэлцэл хийсэн талаар тус биржээс мэдээллээ. Эхний улиралд арилжааны идэвх харьцангуй сул буюу 53.7 тэрбум төгрөгтэй тэнцэж байсан бол II улиралд зургаа дахин өсч 396.6 тэрбум төгрөгт хүрсэн байна. Ерөнхий дүнгээрээ энэ оны эхний хагас жилд таван төрлийн түүхий эд биржээр арилжсанаас ямааны самнасан ноолуур, ямаа, тэмээ, хонины завод ноос анх удаа арилжигдаж эхэлжээ. Эдгээрээс хэмжээний хувьд тосны ургамал дийлэнхийг бүрдүүлж байхад үнийн дүнгээрээ ямааны ноолуур хамгийн их байсан аж. Ингэснээр энэ оны эхний хагас жилийн байдлаар 10 мянга 284 тонн тосны ургамал, 5068.5 тонн ноолуур арилжсан бол хонь болон тэмээний ноосны нийт хэмжээ 3536 тоннд хүрчээ. Мөн завод ноосны хэлцлийн хэмжээ 1818.4 тонн болсон талаар Хөдөө аж ахуйн биржээс мэдээллээ. Түүхий эдийн жигнэсэн дундаж үнийг харахад ангилаагүй ноолуур болон боловсруулаагүй бараан, цайвар ноолуурын үнэ хамгийн өндөр хэлбэлзэлтэй байсан байна. Тухайлбал энэ оны эхний улиралд ангилаагүй түүхий ноолуурын дээд үнэ 890 мянган төгрөг, доод үнэ 700 мянган төгрөг байжээ. Мөн энэ оны II улиралд боловсруулаагүй бараан ноолуурын дээд үнэ 900 мянган төгрөг байхад доод үнэ 752 мянган төгрөгт хүрч буурч байсан талаар Хөдөө аж ахуйн биржээс мэдээллээ.

З.Энхболор 

Холбоо барих: enkhbolor.z@bloombergtvmongolia.com 

minjma.g@bloombergtvmongolia.com