Францын Ерөнхийлөгч Франсуа Олланд БНХАУ-д айлчилж, тус улсын Ерөнхий сайд Ли Көциантай уулзсаныхаа дараа БНСУ-д айлчиллаа. Түүний энэ удаагийн айлчлал нь Францын Ерөнхийлөгчийн түвшинд сүүлийн 15 жилд анх удаагийнх болж байгаагаараа онцлог болж байна. Айлчлалын үеэр хоёр улсын Төрийн тэргүүн технологи, сансар судлал, соёл урлаг, боловсрол, аялал жуулчлал, зам тээврийн салбар дахь хамтын ажиллагаагаа өргөжүүлэх санамж бичигт гарын үсэг зурлаа. Мөн Солонгосын хойгийн асуудлаар хамтран ажиллахаар тохирчээ. Францын Ерөнхийлөгч Франсуа Олланд “Солонгосын хойгийн асуудлаар Франц улсын байр суурийг дахин батлан хэлэхэд бид цөмийн зэвсгийн эсрэг тэмцэж, Солонгосын хойгийг цөмийн зэвсэггүй бүс болгохын төлөө ажиллах хүсэлтэй байна. Бид хүний эрхийн асуудлыг чухалчлан авч үзэж, шийдэлд хүрэх бүх төрлийн яриа хэлэлцээг тууштайгаар дэмжих болно” хэмээн мэдэгдсэн байна. Харин БНСУ-ын Ерөнхийлөгч Пак Гын Хэ “Ойрхи Дорнод болон Африкийн бүс нутагт аюулгүй байдлыг хангах асуудалд Францын Ерөнхийлөгч Франсуа Олланд тэргүүлэх үүрэгтэй оролцож байгааг онцолмоор байна. Олон улсад аюулгүй байдлын нэг чухал асуудал болоод байгаа Солонгосын хойгийн асуудлаар манай хоёр улс цаашид хамтран ажиллахаар боллоо. Хоёр Солонгосыг дахин нэгтгэх талаарх манай засгийн газрын төлөвлөгөөг дэмжиж ажиллана гэдэгт чин сэтгэлээсээ талархсанаа илэрхийлмээр байна” гэж онцоллоо.

.Нарантунгалаг

Холбоо барих: narantungalag.e@bloombergtvmongolia.com

minjma.g@bloombergtvmongolia.com