Ерөнхий сайдын огцрох саналыг УИХ дэмжлээ. Ингэснээр Засгийн газар бүрэн бүрэлдэхүүнээрээ огцорч байна.

Ерөнхий сайд У.Хүрэлсүх огцрох саналаа Төв талбайд болсон жагсаалын дараа өөрөө гаргасан бөгөөд түүнийг нь МАН-ын Удирдах зөвлөл болон Парламент ийнхүү дэмжлээ. Харин Ерөнхийлөгч Х.Баттулга дэмжихгүй байгаагаа илэрхийлж, УИХ-ын чуулганд үг хэлсэн юм.

УИХ-ын дарга Г.Занданшатар дараагийн Засгийн газрыг яаралтай байгуулах шаардлагатай бөгөөд гишүүдийг энэ ажилд идэвхтэй оролцохыг уриаллаа.

У.Хүрэлсүхийн Засгийн газар хагас жил орчим ажилласан гэдэг утгаараа хамгийн богино настай Засгийн газруудын нэг болж байна. Ардчилсан сонгууль явуулж эхэлснээс хойш Засгийн газар бүрэн эрхээ хэрэгжүүлсэн дундаж хугацаа 1.8 жил байсан. Өөрөөр хэлбэл Засгийн газар тогтворгүй байсныг судлаачид шүүмжилж ирсэн юм.

Үндсэн хуулийн нэмэлт, өөрчлөлтөөр “Засгийн газрын гишүүнийг Ерөнхий сайд томилж, чөлөөлж, огцруулна” гэсэн зохицуулалт оруулсан. Мөн УИХ-ын гишүүн Засгийн газрын гишүүнээр ажиллахыг хязгаарлаж, "давхар дээл"-тэй сайдын тоог дөрөв болгоод байсан юм.

Б.Бямбасүрэн

Холбоо барих: byambasuren,b@bloombergtvmongolia.com

uyanga.m@bloombergtvmongolia.com