12 дахь жилдээ зохион байгуулагдаж буй “Discover Mongolia” чуулга уулзалтад 120 гаруй компанийн төлөөлө, 500 гаруй зочид төлөөлөгч оролцож байна. Монгол Улс дэлхийн уул, уурхайн салбарт хүч түрэн орж ирж байгаа ч өөрсдөө үнэ тогтоож чадахгүй байгаа гэдгийг судлаачид илтгэлдээ онцолжээ. УИХ-ын хаврын чуулганаар ашигт малтмалын тухай хуульд нэмэлт өөрчлөлт орсон, 106 лицензийн асуудлыг шийдвэрлэх гарц олсон зэрэг эерэг нөхцөл байдал хөрөнгө оруулагчдын итгэлийг нэмэгдүүлсэн болохыг энэ удаагийн чуулга уулзалтаас харж болохоор байна. Мөн эрдэс баялгийн салбарын бодлогоо тодорхойлж хөрөнгө оруулагчдыг татахад анхаарал хандуулж байгаагаа Уул, уурхайн сайд Д.Ганхуяг илэрхийлсэн юм. 2014 оны эхээр Монголбанкинд тушаасан алтанд ногдох роялтийн татварыг 2.5 хувь болгосон хуулийг баталсан бөгөөд ингэснээр олборлолт нэмэгдэж, алт тушаалт эрчимжиж энэ оны эхнээс 6.4 тоннд хүрчээ. Гэхдээ “Оюу Толгой” төслийн санхүүжилтийн асуудал эцэслэн шийдэгдээгүй, урт нэртэй хуулийн хүрээнд түдгэлзсэн тусгай зөвшөөрлүүдийг түдгэлзүүлсэн хэвээр байгааг хөрөнгө оруулагчид онцоллоо. Энэ удаагийн чуулганаар хууль эрх зүйн орчин, нүүрсний экспорт, алтны салбар, геологи хайгуул, уул уурхайн төслийн санхүүжилт зэрэг таван гол сэдвээр салбар болон хуралдаж байна. 

З.Энхболор 

Холбоо барих: enkhbolor.z@bloombergtvmongolia.com 

minjma.g@bloombergtvmongolia.com