Гаалийн ерөнхий газрын мэдээлснээр Монгол Улс сүүлийн нэг жилийн хугацаанд найман сая гаруй ам.долларын амны хаалт, 12 мянган ширхэг агаар цэвэршүүлэгч импортолсон байна. Энэ нь 2016 оныхоос хоёр дахин өссөн үзүүлэлт болжээ. Агаарын бохирдол, утааны эсрэг технологи бүхий бүтээгдэхүүний борлуулалт өсөж, нэр төрөл нь ч нэмэгдэж байгааг Агаар орчны бохирдолтой тэмцэх сангийн судлаачид онцолж байгаа юм. Утааг бууруулах, утаанаас хамгаалах гэсэн хоёр төрлийн бүтээгдэхүүн худалдаалагчид сүүлийн үеийн шинэ шийдлүүдийг нэвтрүүлэх болсон байна. Тухайлбал, “Mind Tech” компани 2017 оны аравдугаар сарaaс “Bone” амны хаалт, “Wynd” агаар хэмжигч, цэвэршүүлэгчийг худалдаалж эхэлжээ. Энэ хугацаанд “Bone” амны хаалт 11 ширхгийг, “Wynd” төхөөрөмжөөс хоёр ширхгийг урьдчилсан захиалгаар борлуулаад байна. 165 мянган төгрөгийн үнэтэй “Bone” амны хаалт утасгүй интернетийн сүлжээгээр ажилладаг төдийгүй гар утасны “bluetooth” чихэвч, агаарын чанар хэмжигч зэргийг өөртөө суурилуулжээ. Агаарын чанар тогтсон дээд хэмжээнээс хэтрэх үед дохиолол нь ажиллана. Хорт утааг 99 хувь хүртэл шүүдэг байна. Энэхүү амны хаалтын анхны туршилтыг Бээжингийн өтгөн манан дунд хийсэн гэдгээрээ онцлог аж. Харин өртөг өндөртэй “Wynd” төхөөрөмж 1.8 сая төгрөгийн үнэтэй. Авсаархан хирнээ хүчин чадал өндөртэй энэхүү төхөөрөмж агаарын чанарын индексийг хэмжиж автоматаар цэвэршүүлдэг тусгай системээр ажиллана. Зөөврийн төхөөрөмж учраас таны байгаа орчны бохирдлыг цэвэршүүлэх юм. Гар утас болон ухаалаг цагтай холбож мэдээллийг тогтмол авах боломжтой.

Үүнээс гадна Германы “GNS” брэндийн агаар хэмжигч цагийг “Smart Shop” дэлгүүрт урьдчилсан захиалгаар худалдаалж байна. Өнгөрсөн оны аравдугаар сараас хойш нийт 20 гаруй ширхгийг борлуулаад байгаа аж. 280 мянган төгрөгийн үнэтэй энэхүү ухаалаг цаг нь агаарын чанарын индекс тогтоодог. Ингэснээр танд амны хаалт зүүх шаардлагатай газруудад сэрүүлэгтэй дохиолол өгч шаардлагагүй үед мөн сануулах тохиргоотой. Байнга амны хаалт зүүснээр арьс амьсгалдаггүй учраас арьсыг гэмтээхгүй байх үүднээс энэхүү цагийг зохион бүтээжээ. Эдгээр төхөөрөмжүүдийн өртөг өндөр учраас зорилтот хэрэглэгчид худалдан авч байгаа талаар борлуулагчид мэдээллээ.

Ж.Жаргалмаа

Холбоо барих: jargalmaa.j@bloombergtvmongolia.com

minjma.g@bloombergtvmongolia.com