УИХ-ын чуулганы нэгдсэн хуралдаанаар Урт нэртэй хуулийг дагаж мөрдөх журмын тухай хуульд нэмэлт өөрчлөлт оруулах тухай асуудлыг хэлэлцэх нь зүйтэй гэж үзээд Эдийн Засгийн байнгын хороо руу шилжүүллээ. 2009 онд батлагдсан тус хуулийн хэрэгжилт сул байсан учраас Засгийн газраас өөрчлөлт оруулах санал гаргаж 2013 онд УИХ-д өргөн мэдүүлсэн. Хуучнаар Байгаль орчин, аялал жуулчлалын яамнаас 2012 онд гол мөрний урсац бүрэлдэх эх, усны сан бүхий газар, ойн сан бүхий газрын хамгаалалтын бүсийг улсын хэмжээнд баталсан. Эдгээр талбайд давхардсан тоогоор хайгуулын 909, ашиглалтын 427 тусгай зөвшөөрөл олгосон байна. Энэ нь 2014 оны байдлаар хүчин төгөлдөр байгаа хайгуулын тусгай зөвшөөрлийн 67 хувь, Ашиглалтын тусгай зөвшөөрлийн 29 хувьтай тэнцэж байгаа юм. Урт нэртэй хуультай холбоотойгоор үйл ажиллагаа нь зогсонги байдалд ороод байгаа компаниуд тусгай зөвшөөрлийн төлбөр, хайгуулын талбайд оруулсан хөрөнгө оруулалт 660 орчим тэрбум төгрөгөөр хэмжигдэж байгаа юм. Хэрэв тусгай зөвшөөрлийг нь цуцлавал ийм хэмжээний нөхөн төлбөрийг төсвөөс гаргах аж. Харин нэмэлт өөрчлөлтөөр 2009 оны долдугаар сараас өмнө олгосон тусгай зөвшөөрлүүдийн хилийн заагт хамаарах хэсэгт тусгай зөвшөөрөл эзэмшигч үйл ажиллагаагаа үргэлжлүүлэх өргөдөл гаргавал онцгой бүсэд үйл ажиллагаа явуулах шаардлага хангасан эсэхийг судалж, мэргэжлийн байгууллагаас гаргасан дүгнэлтэд үндэслэн гэрээ байгуулахаар тусгасан байна. Харин үйл ажиллагаагаа үргэлжлүүлэх хүсэлт гаргаагүй болон холбогдох шаардлагыг хангаагүй тохиолдолд тусгай зөвшөөрлийг нөхөн олговоргүй цуцлах заалт оруулжээ.

Э.Нарантунгалаг

Холбоо барих: Narantungalag.e@bloombergtvmongolia.com

Tsatsralt.b@bloombergtvmongolia.com