Автомашин үйлдвэрлэгчдийн оны эхний улирлын тайлангийн үзүүлэлтүүд эерэг гарч буй нь улс орнууд цар тахлын хямралаас сэргэж, энэ зах зээл цаашид ч өсөх төлөвтэй байгааг харуулж байна.

Тухайлбал: “General Motors” I улиралд БНХАУ-д 780 мянган автомашин борлуулснаа тайлагналаа. Энэ нь өмнөх оны мөн үеэс 69 хувиар өссөн үзүүлэлт болж байна. Тус улсын эдийн засаг сэргэж, SUV ангиллын автомашины эрэлт өссөн нь үүнд нөлөөлжээ.

Лхагва гарагийн арилжаагаар “General Motors”-ийн хувьцааны ханш 0.14 хувиар өсөж, 61 ам.долларт хаагдсан байна.

Харин тансаг зэрэглэлийн автомашин үйлдвэрлэгч “Mercedes Benz” компанийн АНУ дахь борлуулалт өмнөх оноосоо 18 хувиар өсжээ. Тус компани нийт 78 мянга 256 нэгж автомашин борлуулсан байна.

Японы автомашин үйлдвэрлэгч “Toyota Motor” компанийн SUV ангиллын “Lexus RX” болон “NX” загварын эрэлт өндөр байна. I улирлын борлуулалт нь 32 хувиар өсөж, 74 мянган нэгж автомашин хүрсэн гэж тус компани тайлагнажээ.

Цар тахлын нөлөө авто зах зээлд хүндхэн туссан ч бага оврын автомашины үйлдвэрлэл 2021 онд 14 хувиар өсөх төлөвтэй гэж “IHS Markit” тооцоолсон байна. Тухайлбал: автомашины үйлдвэрлэл Европт 14 хувь, АНУ-д 24 хувь, БНХАУ-д зургаан хувиар өсөхөөр байгаа ажээ.

М.Эрхэс | @ErkhesMunkhbat

Холбоо барих: erkhes.m@bloombergtvmongolia.com

minjma.g@bloombergtvmongolia.com