Энэ долоо хоногийн байдлаар үр тарианы 22 хувь, төмсний 81.1 хувь, хүнсний ногооны 73 хувь, тэжээлийн 21 хувь, тосны ургамлын 11 хувийг хураан аваад байна гэж ХХААХҮЯ-наас мэдээллээ. Нийтдээ 33.3 мянган га-г ангилан хадаж, 75.3 мянган га-гаас 107.6 мянган тонн үр тариа, 10.5 мянган га-гаас 125.7 мянган тонн төмс, 6000 га-гаас 67.7 мянган тонн хүнсний ногоо, 11.8 мянган га-гаас 33.3 мянган тонн тэжээл, 6.3 мянган га-гаас 5000 тонн тосны ургамал хураан авчээ. Энэ онд улаан буудай болон төмсний дотоодын хэрэгцээг 100 хувь, хүнсний ногоо 60-70 хувь хангах зорилтыг салбарын яам тавьсан байна. Улаанбуудай, төмсний дотоодын хэрэгцээг 100 хувь хангах хэмжээнд хүрвэл ургацаа нөөцлөх зоорьны асуудал гарч байгаа аж. Үүнийг Польш улсын Засгийн газраас авахаар болсон 50 сая ам.долларын хөнгөлөлттэй зээлийн 10 сая ам.долларыг хүнсний ногооны зоорь барихад зарцуулж шийдвэрлэхээр болсон талаар ХХААХҮЯ-ны сайд Б.Батзориг мэдээллээ.

2018 онд улсын хэмжээнд 367.3 мянган га-д үр тариа, үүнээс 343.1 мянган га-д буудай, 13 мянган га-д төмс, 8.3 мянган га-д хүнсний ногоо, 69.8 мянган га-д тосны ургамал, 38.8 мянган га-д тэжээлийн ургамал, нийт 497.2 мянган га-д тариалалт хийжээ.

Ургацын урьдчилсан балансаар 450.3 мянган тонн үр тариа, үүнээс 425.8 мянган тонн буудай, 151 мянган тонн төмс, 95.1 мянган тонн хүнсний ногоо, 30.1 мянган тонн тосны ургамал, 86.3 мянган тонн малын тэжээлийн ургамал хураан авахаар тогтоосон байна.

Б.Дөлгөөнзул

Холбоо барих: dulguunzul.b@bloombergtvmongolia.com

minjma.g@bloombergtvmongolia.com